تکبیر نیوز (گریٹ یارماؤتھ): گریٹ یارماؤتھ کے ساحل پر دو نوعمر لڑکیوں کے ساتھ مبینہ زیادتی اور جنسی حملے کے مقدمے میں دوسرا ملزم بھی عدالت میں پیش ہوگیا، جہاں اس نے اپنے خلاف تمام الزامات سے انکار کردیا۔
35 سالہ پولش شہری ڈیوڈ ولاخ بدھ کے روز کنگز لن کراؤن کورٹ میں پیش ہوا۔ اس پر 15 یا 16 مئی کو ایک لڑکی کے ساتھ جنسی زیادتی اور دوسری نوعمر لڑکی کے ساتھ زیادتی اور جنسی حملے کے مجموعی طور پر چار الزامات عائد ہیں۔
ولاخ نے عدالت میں تمام الزامات سے صحتِ جرم سے انکار کیا۔
پولیس کے مطابق یہ واقعات 16 مئی کی صبح سویرے گریٹ یارماؤتھ کے ساؤتھ بیچ پریڈ کے علاقے میں پیش آنے کی اطلاعات کے بعد تحقیقات شروع کی گئی تھیں۔
مقدمے میں دوسرا ملزم 34 سالہ مدالین ایلینکا بھی عدالت میں پیش ہوچکا ہے۔ رومانیہ سے تعلق رکھنے والے ایلینکا نے گزشتہ ماہ نارویچ کراؤن کورٹ میں اپنے خلاف عائد زیادتی اور جنسی حملے کے الزامات سے انکار کیا تھا۔
پولیس کے مطابق ایلینکا پر ایک لڑکی سے زیادتی اور جنسی حملے جبکہ دوسری لڑکی کے ساتھ جنسی حملے کا الزام ہے۔
دونوں ملزمان کا مقدمہ 7 دسمبر سے نارویچ کراؤن کورٹ میں شروع ہونے والا ہے، جس کے لیے تقریباً 10 روز کا وقت مقرر کیا گیا ہے۔
عدالت نے مدالین ایلینکا کو حراست میں رکھنے کا حکم دیا جبکہ ڈیوڈ ولاخ کو مشروط ضمانت دے دی۔