تکبیر نیوز (نارتھ شیلڈز): برطانیہ کے شہر نارتھ شیلڈز میں ای بائیک حادثے میں جاں بحق ہونے والے 18 سالہ نوجوان میک کینزی ریٹ کلف کے اہلخانہ نے اسے شاندار انسان قرار دیتے ہوئے جذباتی خراجِ عقیدت پیش کیا ہے۔
میک کینزی ریٹ کلف 19 اگست کو شام 5 بج کر 25 منٹ پر میڈو ویل کے علاقے میں واٹر ویل روڈ پر الیکٹرک موٹر بائیک چلا رہا تھا کہ اس کی ایک وین سے ٹکر ہوگئی۔
حادثے کے نتیجے میں میک کینزی شدید زخمی ہوا اور جانبر نہ ہوسکا۔ وین چلانے والا 60 سال کی عمر کا شخص حادثے کے بعد موقع پر موجود رہا اور پولیس کی تحقیقات میں تعاون کیا۔
میک کینزی کے والدین نے اپنے بیٹے کو یاد کرتے ہوئے کہا کہ "ہمارے دل ٹوٹ گئے ہیں، کچھ بھی حقیقی محسوس نہیں ہو رہا۔ میک کینزی ایک شاندار نوجوان تھا اور اس کی پوری زندگی اس کے سامنے تھی۔”
اہلخانہ نے مشکل وقت میں ساتھ دینے والے لوگوں کا شکریہ ادا کیا اور خاص طور پر ایک خاتون کو خراجِ تحسین پیش کیا جس نے امدادی ٹیموں کے پہنچنے تک میک کینزی کو مسلسل سی پی آر دی۔
والدین نے کہا کہ میک کینزی کے انتقال سے اس کے بھائی لیٹن، بہنوں بروگن اور بونی، دادا دادی، نانا، دیگر رشتہ داروں، دوستوں اور اس کی گرل فرینڈ اولیویا کے دل ٹوٹ گئے ہیں۔ ان کے مطابق اولیویا میک کینزی کی دنیا تھی اور وہ ہمیشہ ان کے خاندان کا حصہ رہے گی۔
میک کینزی بطور الیکٹریشن اپرنٹس کام کر رہا تھا۔
نارتھمبریا پولیس کے روڈز پولیسنگ یونٹ کے سارجنٹ کریگ بارٹل نے کہا کہ پولیس کی ہمدردیاں میک کینزی کے اہلخانہ کے ساتھ ہیں اور افسران اس مشکل وقت میں خاندان کو تعاون فراہم کر رہے ہیں۔
پولیس نے حادثے کے حوالے سے مزید معلومات رکھنے والے افراد سے بھی اپیل کی ہے کہ وہ سامنے آئیں۔ خاص طور پر ایسے افراد جن کے پاس حادثے کی ڈیش کیم فوٹیج موجود ہو، وہ پولیس سے رابطہ کریں۔