ٹماٹر کو تازہ رکھنے کے لیے فریج میں رکھنا عام عادت ہے، تاہم ایک فوڈی کے مطابق سرد درجہ حرارت ٹماٹر کے ذائقے اور ساخت کو متاثر کرسکتا ہے، جس کے باعث ٹماٹر پھیکے اور پانی جیسے محسوس ہوسکتے ہیں۔
اگست ٹماٹر کی پیداوار کا اہم موسم ہے اور اس دوران گھروں اور سپر مارکیٹس میں مختلف اقسام کے ٹماٹر بڑی تعداد میں دستیاب ہوتے ہیں۔ ایسے میں انہیں زیادہ عرصے تک تازہ رکھنے کے لیے درست طریقے سے ذخیرہ کرنا بھی ضروری ہے۔
فریج میں رکھنے سے ذائقہ متاثر ہونے کا دعویٰ
انسٹاگرام پر کھانا پکانے سے متعلق معلومات شیئر کرنے والی میکا جیو نے صارفین کو خبردار کیا کہ ٹماٹر کو فریج میں رکھنے سے اس کا ذائقہ متاثر ہوسکتا ہے۔
ان کے مطابق ٹھنڈا درجہ حرارت ان انزائمز کی سرگرمی کو متاثر کرتا ہے جو ٹماٹر کے ذائقے کو برقرار رکھنے میں کردار ادا کرتے ہیں، جبکہ سردی ٹماٹر کی ساخت کو بھی خراب کرسکتی ہے اور گوشت نرم یا بے مزہ محسوس ہوسکتا ہے۔
ٹماٹر کہاں اور کیسے رکھیں؟
میکا جیو کے مطابق پورے ٹماٹر کو کمرے کے درجہ حرارت پر، براہ راست دھوپ سے دور رکھنا بہتر ہے۔
انہوں نے ٹماٹر کو ڈنڈی والی طرف نیچے رکھنے کا مشورہ بھی دیا ہے۔ ان کے مطابق اس طریقے سے نمی کے ضیاع اور ٹماٹر پر دباؤ یا خراش کے امکانات کم ہوسکتے ہیں۔
رپورٹ کے مطابق مناسب طریقے سے رکھنے سے ٹماٹر کی تازگی تقریباً ایک ہفتے تک برقرار رکھنے میں مدد مل سکتی ہے۔
کٹے اور زیادہ پکے ٹماٹر فریج میں رکھیں
تاہم یہ مشورہ ہر قسم کے ٹماٹر کے لیے یکساں نہیں ہے۔
زیادہ پکے ہوئے یا پہلے سے کٹے ہوئے ٹماٹر کو خراب ہونے کا عمل سست کرنے کے لیے فریج میں رکھنا بہتر ہے۔ کھانے سے کچھ دیر پہلے انہیں دوبارہ کمرے کے درجہ حرارت پر لایا جاسکتا ہے تاکہ ذائقہ بہتر محسوس ہو۔
ٹماٹر جلد پکانے کا آسان طریقہ
اگر ٹماٹر ابھی کچے ہوں اور انہیں جلد پکانا مقصود ہو تو انہیں براہ راست دھوپ میں رکھنے کے بجائے کمرے کے درجہ حرارت پر کاغذ کے تھیلے میں رکھا جاسکتا ہے۔
ایک پکا ہوا کیلا ساتھ رکھنے سے بھی ٹماٹر کے پکنے کے عمل کو تیز کرنے میں مدد مل سکتی ہے، کیونکہ کیلا ایتھیلین گیس خارج کرتا ہے جو پھلوں کے پکنے کے عمل میں کردار ادا کرتی ہے۔
سوشل میڈیا پر صارفین کا ردعمل
میکا جیو کی ٹماٹر ذخیرہ کرنے سے متعلق پوسٹ کو ایک لاکھ تین ہزار سے زائد لائکس مل چکے ہیں۔
متعدد صارفین نے اعتراف کیا کہ انہیں اس فرق کا پہلے علم نہیں تھا، جبکہ کچھ افراد نے اس طریقے کو کھانے کے ضیاع میں کمی کے لیے مفید قرار دیا۔