سمیتھوک: برطانیہ کے علاقے سمیتھوک، ویسٹ مڈلینڈز میں ایک گھر سے ایک شخص کی لاش برآمد ہونے کے بعد 60 سالہ شخص کو قتل کے شبے میں گرفتار کر لیا گیا ہے۔
ویسٹ مڈلینڈز پولیس کے مطابق جمعرات 6 اگست کو سہ پہر تقریباً 3:15 بجے ایک شہری کی جانب سے 999 پر اطلاع ملنے کے بعد پولیس ساؤتھ روڈ کے ایک گھر پہنچی، جہاں ایک شخص کی لاش ملی۔
پولیس کا کہنا ہے کہ جاں بحق ہونے والا شخص 40 برس کی عمر میں تھا۔ اس کے اہل خانہ کو اطلاع دے دی گئی ہے جبکہ خصوصی تربیت یافتہ افسران خاندان کی معاونت کر رہے ہیں۔
واقعے کے کچھ ہی دیر بعد 60 سالہ شخص کو قتل کے شبے میں گرفتار کر لیا گیا، جو تاحال پولیس حراست میں ہے۔
تحقیقات کے سلسلے میں ساؤتھ روڈ کو لٹل مور ہل سے نارتھ اسٹریٹ تک گھیرے میں لے لیا گیا ہے، جبکہ تفتیشی ٹیمیں علاقے میں گھر گھر جا کر پوچھ گچھ، سی سی ٹی وی فوٹیج اور دیگر شواہد اکٹھے کر رہی ہیں۔
ویسٹ مڈلینڈز پولیس نے اپنے بیان میں کہا:
"ہم نے سمیتھوک کے ساؤتھ روڈ پر ایک گھر سے لاش ملنے کے بعد ایک شخص کو قتل کے شبے میں گرفتار کیا ہے۔ جاں بحق شخص کے اہل خانہ کو اطلاع دے دی گئی ہے اور ہماری ہمدردیاں ان کے ساتھ ہیں۔”
پولیس نے عوام سے اپیل کی ہے کہ اگر کسی کے پاس سی سی ٹی وی، موبائل فون یا ڈیش کیم فوٹیج موجود ہو تو وہ 101 پر رابطہ کرے یا پولیس کی ویب سائٹ کے ذریعے معلومات فراہم کرے اور لاگ ریفرنس 3109 برائے 6 اگست کا حوالہ دے۔
پولیس کا کہنا ہے کہ ابتدائی تحقیقات کے مطابق یہ ایک منفرد (Isolated) واقعہ معلوم ہوتا ہے اور فی الحال عوام کے لیے کسی فوری خطرے کی اطلاعات نہیں ہیں۔