تکبیر نیوز — برطانیہ:
برطانیہ کے علاقے ہنٹنگڈن، کیمبرج شائر میں مگرمچھ کے حملے میں شدید زخمی ہونے والے تین سالہ بچے کے اہلخانہ نے پہلی بار عوام سے اظہارِ تشکر کرتے ہوئے بتایا ہے کہ بچے کی حالت اب مستحکم ہے، تاہم اسے صحت یاب ہونے میں طویل وقت لگے گا۔
یہ واقعہ 18 جون کو جانسنز آف اولڈ ہرسٹ (Johnson’s of Old Hurst) میں پیش آیا تھا، جہاں مبینہ طور پر ایک شخص نے تین سالہ بچے کو مگرمچھوں کے باڑے میں پھینک دیا تھا۔
پولیس کے مطابق زخمی بچہ اب بھی ایڈنبروکس اسپتال (Addenbrooke’s Hospital) میں زیرِ علاج ہے۔ اس کی متعدد سرجریاں ہو چکی ہیں اور ڈاکٹروں کے مطابق اسے مکمل صحت یابی کے لیے طویل بحالی کے مرحلے سے گزرنا ہوگا۔
بچے کے اہلخانہ نے اپنے بیان میں کہا:
"ہم چڑیا گھر کے عملے کے بے حد شکر گزار ہیں جنہوں نے ہمارے بیٹے کو مگرمچھوں کے باڑے سے بروقت نکالا۔ ہم عوام کی دعاؤں، نیک تمناؤں اور اسپتال میں ہمارے بیٹے کی دیکھ بھال کرنے والے تمام افراد کے بھی تہہ دل سے شکر گزار ہیں۔”
بیان میں مزید کہا گیا کہ اس وقت خاندان کی پوری توجہ بچے کی صحت یابی اور اس مشکل مرحلے میں اس کی ہر ممکن مدد پر مرکوز ہے۔
دوسری جانب بچے کے علاج، بحالی اور اہلخانہ کی معاونت کے لیے ایک فنڈ ریزنگ مہم بھی شروع کی گئی ہے۔ منتظمین کے مطابق ضرورت سے زائد جمع ہونے والی رقم ایڈنبروکس ٹرسٹ سے وابستہ ان خیراتی اداروں کو دی جائے گی جو اسی طرح کے حالات سے گزرنے والے دیگر خاندانوں کی مدد کرتے ہیں۔
پولیس نے اس واقعے کے سلسلے میں 30 سالہ شخص کو اقدامِ قتل کے شبہے میں گرفتار کیا تھا، تاہم طبی معائنے کے بعد اسے تفتیش کے لیے نااہل قرار دیتے ہوئے ضمانت پر رہا کر دیا گیا ہے، جبکہ تحقیقات جاری ہیں۔