تکبیر نیوز، نوٹنگھم: برطانیہ کے شہر نوٹنگھم میں ایک نئی رہائشی اسکیم کے مکینوں نے تعمیراتی کمپنی پر وعدہ خلافی کا الزام عائد کرتے ہوئے شدید احتجاج کیا ہے۔ رہائشیوں کا کہنا ہے کہ جس خوبصورت سبزہ زار اور تفریحی میدان کا وعدہ کیا گیا تھا، وہ آج گھاس کے بجائے جڑی بوٹیوں، خشک زمین اور خراب حالت کے باعث ویران منظر پیش کر رہا ہے۔
میپرلے کے علاقے میں واقع الیگزینڈرا پلیس رہائشی منصوبے کے مکینوں کے مطابق بچوں، خاندانوں اور پالتو جانوروں کیلئے مختص کھلی جگہ اب ناقابل استعمال بنتی جا رہی ہے۔ ان کا کہنا ہے کہ علاقے میں جگہ جگہ خطرناک جڑی بوٹیاں اگ آئی ہیں جبکہ درخت بھی سوکھنے لگے ہیں۔
مقامی رہائشی جو ایکرمین کا کہنا ہے کہ جب انہوں نے یہاں گھر خریدا تو انہیں ایک خوبصورت سبز اور محفوظ ماحول کا خواب دکھایا گیا تھا، لیکن اب صورتحال بالکل مختلف ہے۔ ان کے مطابق تعمیراتی کمپنی نے تمام مکانات فروخت ہونے کے بعد اس جگہ پر توجہ دینا تقریباً چھوڑ دی ہے۔
ایک اور رہائشی ولادیمیر کورولکوف نے کہا کہ انہیں اندازہ ہی نہیں تھا کہ اتنی اقسام کی جڑی بوٹیاں ایک ہی جگہ اگ سکتی ہیں۔ بعض جڑی بوٹیاں ایک میٹر سے بھی زیادہ بلند ہو چکی ہیں جبکہ سبز میدان کی جگہ زمین ایک ویران اور غیر آباد منظر پیش کر رہی ہے۔
رہائشیوں کا کہنا ہے کہ بچوں کے کھیل کے میدان، کتے کے فضلے کیلئے ڈبوں اور دیگر بنیادی سہولیات کی بہتری کیلئے بھی انہیں مسلسل آواز اٹھانی پڑی۔ اس کے علاوہ بعض راستے اور سیڑھیاں خستہ حال اور خطرناک حالت میں موجود ہیں۔
دوسری جانب تعمیراتی کمپنی نے اعتراف کیا ہے کہ ابتدائی مرحلے میں میدان میں غلط قسم کی گھاس لگا دی گئی تھی، حالانکہ منصوبے کے مطابق مخصوص قدرتی گھاس لگائی جانی تھی۔ کمپنی کا کہنا ہے کہ غلطی کی نشاندہی کے بعد پرانی گھاس ختم کر کے نئی گھاس کاشت کی گئی، تاہم غیر معمولی موسمی حالات کے باعث مطلوبہ نتائج حاصل نہیں ہو سکے۔
کمپنی کے ترجمان کے مطابق سبزہ زار کی مکمل بحالی تک اسے رہائشیوں کے حوالے نہیں کیا جائے گا اور اس دوران تمام دیکھ بھال اور اضافی اخراجات کمپنی خود برداشت کر رہی ہے۔ ترجمان کا کہنا ہے کہ رہائشیوں سے اس جگہ کی دیکھ بھال کے کوئی چارجز وصول نہیں کیے جا رہے۔
تاہم مقامی افراد اس وضاحت سے مطمئن نہیں اور ان کا کہنا ہے کہ وعدوں اور زمینی حقیقت میں واضح فرق موجود ہے۔ ان کے مطابق اگر صورتحال جلد بہتر نہ ہوئی تو اس کا اثر علاقے میں موجود گھروں کی مالیت پر بھی پڑ سکتا ہے۔