تکبیر نیوز (ڈورچیسٹر): برطانیہ کے شہر ڈورچیسٹر میں جنگلی پرندوں کو غلیل سے نشانہ بنانے کے واقعات پر پولیس حرکت میں آگئی، حکام نے نوجوانوں کے ایک گروپ کی واضح ویڈیو حاصل کرنے کے بعد ملوث افراد کی شناخت کے لیے تحقیقات شروع کردی ہیں۔
ڈورچیسٹر پولیس کے مطابق دریائے واکس کے علاقے میں جنگلی پرندوں کو مبینہ طور پر غلیل کے ذریعے نشانہ بنانے کی شکایات سامنے آئی تھیں، جس پر شہریوں نے پولیس سے رابطہ کرکے اپنی تشویش سے آگاہ کیا اور شواہد بھی فراہم کیے۔
پولیس کا کہنا ہے کہ شہریوں کی جانب سے فراہم کردہ معلومات اور شواہد کی مدد سے تازہ واقعے میں مبینہ طور پر ملوث نوجوانوں کے ایک گروپ کی واضح ویڈیو حاصل کرلی گئی ہے۔
پولیس کے مطابق افسران اب ویڈیو میں موجود تمام افراد کی شناخت کرنے کی کوشش کررہے ہیں، جس کے بعد ان کے خلاف مناسب کارروائی کی جائے گی۔
ڈورچیسٹر پولیس کے ترجمان نے کہا کہ دریائے واکس کے علاقے میں جنگلی پرندوں کو غلیل سے نشانہ بنانے کی حالیہ اطلاعات سے پولیس مکمل طور پر آگاہ ہے اور شہریوں کا شکایات درج کرانے اور شواہد فراہم کرنے پر شکریہ ادا کیا۔
پولیس نے واضح کیا ہے کہ علاقے میں غیر سماجی رویے اور جانوروں پر ظلم کسی صورت برداشت نہیں کیا جائے گا۔
پولیس کے پڑوس کی ٹیم نے بتایا کہ واقعے کو انتہائی سنجیدگی سے لیا جارہا ہے جبکہ علاقے میں باقاعدہ گشت بھی جاری رکھا جائے گا تاکہ ایسے واقعات کی روک تھام کی جاسکے۔
حکام نے شہریوں سے بھی اپیل کی ہے کہ اگر انہیں علاقے میں جنگلی حیات کے خلاف کسی مشتبہ سرگرمی کا علم ہو تو پولیس کو اطلاع دیں تاکہ ذمہ دار افراد کے خلاف کارروائی کی جاسکے۔