تکبیر نیوز (برمنگھم): برمنگھم پولیس کے دو اہلکاروں نے چھٹیوں کے دوران اسپین کے شہر بارسلونا میں ایک بار کے اندر لاپتا شخص کو پہچان کر بین الاقوامی تلاش ختم کرانے میں اہم کردار ادا کردیا، دونوں اہلکاروں نے سوشل میڈیا پر جاری تلاش کی معلومات سے اس شخص کی شناخت کی اور فوری طور پر مقامی حکام کو اطلاع دی۔
پی سی لیمب اور پی سی سومرز گزشتہ ماہ چھٹیوں پر بارسلونا میں موجود تھے، جہاں ایک بار میں ان کی ملاقات "لٹل مک” کے نام سے معروف ایک شخص سے ہوئی۔ اس وقت دونوں اہلکاروں کو علم نہیں تھا کہ مذکورہ شخص کی گمشدگی کے بعد اس کی تلاش جاری ہے اور اس کے اہل خانہ نے اسے لیڈز سے لاپتا قرار دیا ہوا ہے۔
اہلکاروں نے بعد میں سوشل میڈیا پر لاپتا شخص کی تلاش سے متعلق پوسٹس دیکھیں تو انہیں اندازہ ہوا کہ بار میں جس شخص سے ان کی ملاقات ہوئی تھی، وہی مطلوبہ لاپتا شخص ہوسکتا ہے۔
دونوں اہلکاروں نے فوری کارروائی کرتے ہوئے بارسلونا کے متعلقہ حکام اور پولیس سے رابطہ کیا اور اپنی ملاقات کے بارے میں معلومات فراہم کیں، جس کے نتیجے میں مقامی حکام کو لاپتا شخص تک پہنچنے اور اس کے اہل خانہ سے رابطہ کرنے میں مدد ملی۔
بعد میں معلوم ہوا کہ "لٹل مک” کو اپنی گمشدگی کے حوالے سے جاری تلاش کا علم ہی نہیں تھا۔ اس کا موبائل فون گم ہوگیا تھا، جس کی وجہ سے وہ سوشل میڈیا پر اپنے حوالے سے جاری اطلاعات اور تلاش کی اپیلیں نہیں دیکھ سکا تھا۔
برمنگھم پولیس کے چیف انسپکٹر شان کوریگن نے دونوں اہلکاروں کے اقدام کو سراہتے ہوئے کہا کہ ان کا رویہ پولیس فورس کی اقدار کی عکاسی کرتا ہے اور چھٹی پر ہونے کے باوجود انہوں نے ایک ممکنہ طور پر کمزور شخص کی مدد کے لیے فوری قدم اٹھایا۔
انہوں نے کہا کہ اہلکاروں نے جس شخص سے ملاقات کی تھی اسے فوری طور پر پہچانا اور ہسپانوی حکام کو اطلاع دے کر ایک بین الاقوامی تلاش کو ختم کرنے میں مدد کی۔
چیف انسپکٹر کے مطابق اگرچہ مذکورہ شخص خود چھٹی سے لطف اندوز ہورہا ہوسکتا تھا، تاہم برمنگھم پولیس کے دونوں اہلکاروں نے اپنی چھٹی کے دوران بھی معاملے کو سنجیدگی سے لیا اور ضرورت کے وقت معمول سے بڑھ کر کردار ادا کیا۔
دونوں اہلکار اب چھٹیوں سے واپس آچکے ہیں اور ان کے بروقت اقدام کو قومی سطح پر بھی سراہا گیا ہے۔ ان کی کوششوں سے اس شخص کے اہل خانہ کے لیے جاری تشویش کا خاتمہ ہوا اور بین الاقوامی سطح پر جاری تلاش کو انجام تک پہنچانے میں مدد ملی۔