ویلنجبرو (تکبیر نیوز)
برطانیہ کے شہر ویلنجبرو کے ٹاؤن سینٹر میں واقع تاریخی ہِنڈ ہوٹل کو بندش کے بعد فروخت کے لیے مارکیٹ میں پیش کر دیا گیا ہے، جس کی رہنمائی قیمت 10 لاکھ پاؤنڈ مقرر کی گئی ہے۔
گریڈ ٹو لسٹڈ عمارت پر مشتمل یہ ہوٹل 34 کمروں، تین بڑے فنکشن ہالز، ریسٹورنٹ، لاؤنج بار، کافی شاپ، کچنز اور سامان رکھنے کے اسٹور پر مشتمل ہے، جبکہ ہوٹل کے ساتھ تقریباً 11 گاڑیوں کی پارکنگ کی سہولت بھی موجود ہے۔
پراپرٹی کی فروخت کی نگرانی کرنے والے ادارے Prop-Search کے ڈائریکٹر سائمن ٹوسیلینڈ کا کہنا ہے کہ اگرچہ ہوٹل فی الحال بند ہے، تاہم یہ عمارت ویلنجبرو کے عین مرکز میں واقع ہونے کے باعث کاروباری لحاظ سے ایک نایاب موقع فراہم کرتی ہے۔
ان کے مطابق یہ عمارت دوبارہ ہوٹل کے طور پر چلائی جا سکتی ہے، جبکہ اسے دیگر مقاصد کے لیے بھی استعمال کیا جا سکتا ہے، جن میں رہائشی اپارٹمنٹس، کمرشل یا مخلوط استعمال، ثقافتی مرکز، دفاتر، صحت و فلاحی مراکز یا کیئر ہومز شامل ہیں، تاہم اس کے لیے متعلقہ منصوبہ بندی کی منظوری درکار ہوگی۔
یاد رہے کہ ہوٹل انتظامیہ نے رواں ماہ کے آغاز میں کاروباری حالات کو چیلنجنگ قرار دیتے ہوئے ہوٹل بند کرنے کا اعلان کیا تھا۔ سابق مالک مارکس ہولڈن کے مطابق کووڈ کے دوران اور تزئین و آرائش کے باعث ہونے والا قرض ہوٹل بند ہونے کی بڑی وجہ بنا، تاہم یہ مسائل نئے خریدار کے لیے رکاوٹ نہیں ہوں گے۔
دلچسپی رکھنے والے خریدار مزید معلومات کے لیے Prop-Search سے رابطہ کر سکتے ہیں۔