شیفیلڈ: برطانیہ کے شہر شیفیلڈ کے علاقے ونکوبینک میں نومولود بچی کی موت کے بعد پولیس نے قتل کی تحقیقات شروع کردی ہیں، جبکہ واقعے کے سلسلے میں سات افراد کو قتل کے شبے میں گرفتار کرلیا گیا ہے۔
ساؤتھ یارکشائر پولیس کے مطابق اتوار 30 اگست 2026 کو صبح تقریباً 6 بجے نومولود بچی کی حفاظت سے متعلق تشویش پر پولیس کو اطلاع دی گئی۔
اطلاع ملنے کے بعد پولیس نے Holywell Heights میں ایک مکان کی تلاشی لی، جہاں نومولود بچی موجود تھی۔
پولیس اور پیرامیڈیکس کی جانب سے بچی کو بچانے کی بھرپور کوشش کی گئی، تاہم افسوسناک طور پر اسے جائے وقوعہ پر ہی مردہ قرار دے دیا گیا۔
7 افراد قتل کے شبے میں گرفتار
ساؤتھ یارکشائر پولیس کے مطابق واقعے کی تحقیقات کے دوران سات افراد کو قتل کے شبے میں گرفتار کیا گیا ہے۔ تمام گرفتار افراد اس وقت پولیس کی تحویل میں ہیں، جبکہ پولیس ان میں سے بعض کی عمروں کا تعین کرنے کی کوشش کر رہی ہے۔
تحقیقات کی سربراہی کرنے والی ڈیٹیکٹو چیف انسپکٹر ایما نائٹ نے کہا کہ واقعے کی خبر مقامی آبادی کے لیے انتہائی تشویش کا باعث ہوگی، تاہم پولیس کی ایک خصوصی ٹیم بچی کی موت کے معاملے میں انصاف یقینی بنانے کے لیے کام کر رہی ہے۔
پولیس افسر کے مطابق تحقیقات ابھی ابتدائی مرحلے میں ہیں اور عوام سے اپیل کی گئی ہے کہ واقعے سے متعلق کسی بھی قسم کی قیاس آرائی سے گریز کیا جائے۔
پولیس کی عوام سے اپیل
ساؤتھ یارکشائر پولیس نے عوام سے اپیل کی ہے کہ اگر کسی شخص کے پاس اس واقعے سے متعلق کوئی معلومات موجود ہیں تو وہ پولیس سے رابطہ کرے۔
پولیس کا کہنا ہے کہ تحقیقات جاری ہیں اور مزید معلومات سامنے آنے پر صورتحال سے آگاہ کیا جائے گا۔