تکبیر نیوز (برمنگھم، برطانیہ): برمنگھم کے علاقے ڈگبیتھ میں فائرنگ کے واقعے کے سلسلے میں پولیس نے تیسرے شخص پر فردِ جرم عائد کردی ہے۔ 27 سالہ ایون پیٹرسن پر اقدامِ قتل، آتشیں اسلحہ رکھنے اور پرتشدد بدامنی کے الزامات عائد کیے گئے ہیں۔
ویسٹ مڈلینڈز پولیس کے مطابق یہ کارروائی 23 اگست 2026 کو ڈگبیتھ میں پیش آنے والے فائرنگ کے واقعے کی تحقیقات کے سلسلے میں کی گئی، جس میں ایک شخص کو ٹانگ میں گولی لگی تھی۔
واقعہ اتوار 23 اگست کی رات تقریباً 11 بج کر 20 منٹ پر Hack Street اور Bromley Street کے کونے کے قریب پیش آیا، جہاں مبینہ طور پر ہونے والی ہنگامہ آرائی سڑک تک پھیل گئی اور اسی دوران ایک شخص کو فائرنگ کرکے زخمی کردیا گیا۔
27 سالہ شخص گرفتار اور چارج
پولیس کے مطابق برمنگھم سے تعلق رکھنے والے ایون پیٹرسن کو جمعہ 28 اگست کو گرفتار کیا گیا، جس کے بعد اس پر تین الزامات عائد کیے گئے۔
ان میں اقدامِ قتل، آتشیں اسلحہ رکھنے اور violent disorder کے الزامات شامل ہیں۔
پیٹرسن کو پیر 31 اگست کو برمنگھم مجسٹریٹس کورٹ میں پیش کیا جانا تھا۔
اس کیس میں دو افراد پہلے ہی چارج
ویسٹ مڈلینڈز پولیس کے مطابق اسی واقعے کے سلسلے میں دو افراد کو اس سے قبل چارج کیا جاچکا ہے۔
پولیس کا کہنا ہے کہ واقعے کی تحقیقات بدستور جاری ہیں اور افسران فائرنگ کے مکمل حالات اور اس میں ملوث افراد کے کردار کے حوالے سے مزید شواہد اکٹھے کر رہے ہیں۔
فائرنگ کے بعد ڈگبیتھ کی متعلقہ سڑک کو پولیس نے گھیرے میں لے لیا تھا اور جائے وقوعہ پر بڑی تعداد میں پولیس اہلکار تعینات کیے گئے تھے۔
زخمی شخص کو ٹانگ میں گولی لگنے کے بعد اسپتال منتقل کیا گیا تھا۔
پولیس کی عوام سے معلومات کی اپیل
ویسٹ مڈلینڈز پولیس نے عوام سے اپیل کی ہے کہ اگر کسی شخص کے پاس واقعے سے متعلق تصاویر، ویڈیو یا دیگر معلومات موجود ہیں تو وہ پولیس کی جانب سے قائم کیے گئے خصوصی آن لائن پورٹل کے ذریعے تفتیشی ٹیم تک پہنچائے۔
عینی شاہدین 101 پر کال کرکے بھی معلومات فراہم کرسکتے ہیں اور اس موقع پر log 4503 of 23 August کا حوالہ دینے کی درخواست کی گئی ہے۔
پولیس کی تحقیقات جاری ہیں جبکہ مزید گرفتاریوں یا کارروائی کے امکانات کو تفتیش کے نتائج سے جوڑا گیا ہے۔