لیورپول: برطانیہ کے شہر لیورپول میں مرسی ریل (Merseyrail) کی نادرن لائن پر بڑے انجینئرنگ منصوبے کے باعث تقریباً چار ہفتوں تک ٹرین سروس متاثر رہے گی۔
نیٹ ورک ریل (Network Rail) کے مطابق اتوار 11 اکتوبر سے جمعہ 6 نومبر تک لیورپول سینٹرل (Liverpool Central) اور ہنٹس کراس (Hunts Cross) کے درمیان ٹرین سروس مکمل طور پر معطل رہے گی۔
حکام کے مطابق اتوار کے روز بندش کا دائرہ سینڈہلز (Sandhills) تک بڑھا دیا جائے گا۔ اس دوران مسافروں کی سہولت کے لیے:
- پیر سے ہفتہ تک ہنٹس کراس اور لیورپول سینٹرل کے درمیان متبادل بس سروس چلائی جائے گی۔
- اتوار کو بسیں ہنٹس کراس سے سینڈہلز تک چلیں گی۔
- پیر سے ہفتہ تک لیورپول سینٹرل سے ساؤتھ پورٹ، اورمسکرک اور ہیڈبولٹ لین کے لیے ترمیم شدہ ٹرین سروس جاری رہے گی۔
- اتوار کو یہی سروس سینڈہلز سے چلائی جائے گی۔
نیٹ ورک ریل نے بتایا کہ 35 لاکھ پاؤنڈ لاگت سے جاری منصوبے کے تحت شہر کے جنوبی حصے سے آنے والی ریلوے لائن کے چار سرنگوں کی واٹر پروفنگ اور مضبوطی کا کام کیا جائے گا تاکہ پانی کے رساؤ کو روکا جا سکے، جو بجلی کی فراہمی اور ٹرین سروس میں رکاوٹ کا باعث بنتا ہے۔
اس منصوبے میں ٹریک فیڈر سوئچز بھی نصب کیے جائیں گے، جن کی مدد سے ریلوے لائن کے مختلف حصوں کی بجلی کو دور سے کنٹرول کیا جا سکے گا، جس سے مستقبل میں مرمت کا کام تیز اور مسافروں کے لیے کم خلل کا باعث ہوگا۔
نیٹ ورک ریل کے مطابق لیورپول سینٹرل اسٹیشن ملک کے مصروف ترین ریلوے اسٹیشنوں میں شمار ہوتا ہے، جہاں 2024/25 کے دوران ایک کروڑ چالیس لاکھ سے زائد مسافروں کی آمد و رفت ریکارڈ کی گئی۔
ادھر لیورپول لبرل ڈیموکریٹس کے کونسلر رچرڈ کلین نے مقامی رہائشیوں کو پیشگی آگاہ کرتے ہوئے کہا کہ مسافر اس عرصے کے دوران اپنے سفر کی منصوبہ بندی پہلے سے کر لیں کیونکہ کئی اسٹیشنوں پر ریل کی جگہ بس سروس فراہم کی جائے گی۔