ڈیون: برطانیہ کے ساحلی قصبے ٹیگنماؤتھ (Teignmouth) میں واقع اسپتال میں لگنے والی آگ کو پولیس نے آتش زنی قرار دیتے ہوئے حالیہ دنوں میں پیش آنے والے دیگر مشتبہ آتشزدگی کے واقعات کی تحقیقات شروع کر دی ہیں۔
ڈیون اینڈ کارن وال پولیس کے مطابق پیر 3 اگست کی رات تقریباً 10:20 بجے مل لین پر واقع ٹیگنماؤتھ اسپتال میں آگ لگنے کی اطلاع ملی۔
ڈیون اینڈ سمرسیٹ فائر اینڈ ریسکیو سروس نے بتایا کہ آگ اسپتال کی ایک بیرونی عمارت (آؤٹ بلڈنگ) میں لگی، جو بعد میں قریبی عمارت تک پھیل گئی۔ واقعے میں تین شیڈ مکمل طور پر تباہ ہوگئے، تاہم کسی شخص کے زخمی ہونے کی اطلاع نہیں ملی۔
پولیس کا کہنا ہے کہ واقعے کی آتش زنی کے زاویے سے تحقیقات کی جا رہی ہیں، جبکہ قصبے میں پیش آنے والی دو دیگر مشتبہ آگ کے واقعات کا بھی جائزہ لیا جا رہا ہے تاکہ یہ معلوم کیا جا سکے کہ آیا ان کے درمیان کوئی تعلق موجود ہے یا نہیں۔
تحقیقات کے مطابق:
- 12 جولائی کو فورتھ ایونیو میں ایک گھر کے باغ میں آگ لگی تھی۔
- جبکہ 3 اگست کو کولمین ایونیو میں ایک اور آگ نے باغ کے شیڈ کو شدید نقصان پہنچایا۔
مقامی رہائشی خاتون نے سوشل میڈیا پر بتایا کہ تازہ آگ ان کے گھر تک پہنچنے کے قریب تھی اور اگر بروقت قابو نہ پایا جاتا تو ان کے بیٹے کا کمرہ بھی متاثر ہو سکتا تھا۔
پولیس نے بتایا کہ فی الحال ان واقعات کے سلسلے میں کوئی گرفتاری عمل میں نہیں آئی، جبکہ مختلف پہلوؤں سے تحقیقات جاری ہیں۔