Khyber Pakhtunkhwa میں پہلی بار خواجہ سرا برادری سے تعلق رکھنے والے افراد کو جیل وارڈن کے طور پر بھرتی کر لیا گیا ہے، جسے ایک اہم اور تاریخی پیش رفت قرار دیا جا رہا ہے۔
سپرنٹنڈنٹ جیل کے مطابق 2 خواجہ سرا آئندہ ہفتے سے سینٹرل جیل میں اپنے فرائض باقاعدہ طور پر سنبھالیں گے۔
حکام کے مطابق صوبیہ خان اور زوہیب کو بطور جیل وارڈن تعینات کیا گیا ہے، جو خیبر پختونخوا کی تاریخ میں اپنی نوعیت کی پہلی تقرری ہے۔
اس اقدام کو خواجہ سرا برادری کی سماجی شمولیت، روزگار کے مساوی مواقع اور سرکاری اداروں میں نمائندگی کے حوالے سے مثبت قدم قرار دیا جا رہا ہے۔
ماہرین کا کہنا ہے کہ اس طرح کے فیصلے معاشرتی رویوں میں مثبت تبدیلی لانے اور محروم طبقات کو قومی دھارے میں شامل کرنے میں اہم کردار ادا کرتے ہیں۔
سماجی کارکنوں نے بھی اس پیش رفت کا خیر مقدم کرتے ہوئے کہا ہے کہ خواجہ سرا برادری کو عزت، شناخت اور روزگار کی فراہمی ریاست کی ذمہ داری ہے۔
حکام کے مطابق مستقبل میں بھی میرٹ اور مساوی مواقع کی بنیاد پر مزید اقدامات کیے جائیں گے تاکہ ہر طبقے کو ترقی کے یکساں مواقع میسر آ سکیں۔