برطانیہ کے دارالحکومت لندن میں 1969 کے مشہور اغوا اور قتل کیس کی متاثرہ خاتون موریل مک کے کی باقیات کی تلاش تاحال جاری ہے، جبکہ حالیہ برآمد ہونے والی ہڈی انسان کی نہیں نکلی۔
پولیس کے مطابق ایسٹ لندن کے علاقے بیتھنل گرین میں ایک گھر کے باغ سے ایک ہڈی برآمد ہوئی تھی، جس کے بعد امید پیدا ہوئی کہ شاید یہ موریل مک کے کی باقیات ہو سکتی ہے، تاہم فرانزک معائنے کے بعد تصدیق ہوئی کہ یہ انسانی ہڈی نہیں ہے۔
متاثرہ خاتون کے خاندان نے کہا ہے کہ اس خبر سے انہیں شدید مایوسی ہوئی، لیکن وہ تلاش کا عمل جاری رکھیں گے۔
موریل مک کے کو 1969 میں ان کے گھر سے اغوا کیا گیا تھا، جہاں انہیں غلط شناخت کی بنیاد پر نشانہ بنایا گیا تھا۔ اغوا کاروں نے انہیں ایک اور معروف شخصیت سمجھ کر تاوان کے لیے اغوا کیا تھا۔
اس کیس میں دو افراد کو قتل کا مجرم قرار دے کر سزائیں بھی سنائی جا چکی ہیں، تاہم آج تک خاتون کی لاش برآمد نہیں ہو سکی۔
حال ہی میں نئی معلومات سامنے آنے کے بعد خاندان کی درخواست پر اس مقام پر کھدائی کی گئی تھی جہاں زمین میں ردوبدل کے آثار ملے تھے۔
پولیس کا کہنا ہے کہ ہڈی انسان کی نہ ہونے کے باوجود تلاش کا عمل جاری رہے گا اور مزید شواہد اکٹھے کیے جا رہے ہیں۔