تکبیر نیوز (ٹیلفورڈ): اپنی سابق ساتھی کو نو ماہ تک خوفناک تشدد، دھمکیوں اور کنٹرول کا نشانہ بنانے والے 48 سالہ ڈیوڈ ولکس (David Wilkes) کو 13 سال قید کی سزا سنادی گئی ہے۔
شریوزبری کراؤن کورٹ کو بتایا گیا کہ ٹیلفورڈ کے ہوپ مل کے رہائشی ولکس نے خاتون کو طویل عرصے تک جسمانی اور ذہنی تشدد کا نشانہ بنایا۔
ایک واقعے میں ولکس نے خاتون کے ہاتھ اور پاؤں باندھ دیے، اس کے منہ میں کپڑا ٹھونس دیا اور اسے آگ لگا کر زندہ جلانے کی دھمکی دی۔
ایک دوسرے موقع پر اس نے خاتون پر ہتھوڑے سے حملہ کیا اور تار کے ذریعے اس کا گلا گھونٹنے کی کوشش کی۔
عدالت کو بتایا گیا کہ ولکس نے اپنے گھر میں ایسے انتظامات بھی کیے جن کی وجہ سے خاتون کیلئے گھر سے نکلنا مشکل ہوگیا، جبکہ اس نے گھر میں کیمرے نصب کیے تاکہ خاتون کی سرگرمیوں پر مسلسل نظر رکھ سکے۔
خاتون بالآخر اکتوبر 2024 میں پولیس کو اپنے ساتھ ہونے والے واقعات کی اطلاع دینے میں کامیاب ہوئی، جس کے بعد ولکس کو گرفتار کرکے اس کے خلاف مقدمہ چلایا گیا۔
ویسٹ مرسیا پولیس کے مطابق ولکس کو جون 2025 میں مقدمے کی سماعت کے بعد سابق ساتھی سے متعلق جرائم میں مجرم قرار دیا گیا تھا۔
ولکس کے خلاف ایک دوسرے شخص کو لوٹنے اور اغوا کرنے کی کوشش کا مقدمہ بھی تھا۔ عدالت کو بتایا گیا کہ دسمبر 2023 میں اس نے ایک شخص سے رقم کا مطالبہ کیا، اسے تشدد کا نشانہ بنایا اور اس کی گاڑی لے کر اسے پہلے اسٹرچلی کے ایک پٹرول اسٹیشن اور بعد میں ٹیلفورڈ ٹاؤن سینٹر لے گیا۔
ٹاؤن سینٹر کے پٹرول اسٹیشن کے عملے کو صورتحال مشکوک محسوس ہوئی، جس پر پولیس کو اطلاع دی گئی اور ولکس کو گرفتار کرلیا گیا۔
ویسٹ مرسیا پولیس کے مطابق خاتون کے خلاف جرائم پر جج نے ولکس کو 12 سال قید جبکہ مرد کے خلاف اقدامِ ڈکیتی اور اغوا کے مقدمے میں مزید دو سال قید سنائی۔
دونوں سزائیں یکے بعد دیگرے چلانے کا حکم دیا گیا، جس سے مجموعی سزا 14 سال بنتی تھی، تاہم جج نے اسے کم کرکے 13 سال قید مقرر کردیا۔
ولکس کو خاتون سے متعلق 20 ماہ کا پابندی کا حکم بھی دیا گیا ہے۔
اسے اقدامِ ڈکیتی، اغوا، غیر قانونی حراست، جسمانی نقصان پہنچانے والے حملے، گلا گھونٹنے اور کنٹرولنگ و جابرانہ رویے سمیت متعدد جرائم میں سزا دی گئی۔
ویسٹ مرسیا پولیس کی پی سی لورا پرائس نے کہا کہ خاتون کو کئی ماہ تک خوف، تشدد اور کنٹرول کی ایک طویل اور انتہائی سنگین مہم کا سامنا کرنا پڑا۔
انہوں نے متاثرہ خاتون کی ہمت کو سراہتے ہوئے کہا کہ شدید تشدد برداشت کرنے کے باوجود اس نے پولیس کے سامنے آنے اور اپنے ساتھ ہونے والے واقعات رپورٹ کرنے کا حوصلہ دکھایا، جس سے ملزم کو انصاف کے کٹہرے تک پہنچانے میں مدد ملی۔
پولیس نے گھریلو تشدد کا سامنا کرنے والے افراد پر زور دیا ہے کہ وہ خاموش نہ رہیں اور مدد حاصل کریں۔ ہنگامی صورتحال میں 999 جبکہ معلومات گمنام طور پر کرائم اسٹاپرز کو 0800 555 111 پر دی جاسکتی ہیں۔