تکبیر نیوز (نوٹنگھم): نوٹنگھم کے وکٹوریہ سینٹر میں دروازے کو لات مار کر نقصان پہنچانے کے واقعے کے بعد پولیس نے سی سی ٹی وی تصویر جاری کرتے ہوئے ملزم کی شناخت میں عوام سے مدد مانگ لی۔
نوٹنگھم شائر پولیس کے مطابق واقعہ 3 جولائی کو پیش آیا، جب شاپنگ سینٹر کے ایک دروازے کو نقصان پہنچایا گیا۔ واقعے کے نتیجے میں دروازے کا سینسر بھی خراب ہوگیا، جسے تبدیل کرنے پر تقریباً 500 پاؤنڈ لاگت آئی۔
پولیس کا کہنا ہے کہ جاری کی گئی تصویر میں موجود شخص تفتیش میں اہم معلومات فراہم کرسکتا ہے۔
سٹی سینٹر نیبرہڈ پولیسنگ ٹیم کے پی سی میتھیو فشر نے کہا کہ شہر کے مرکز میں اس طرح کے رویے کو برداشت نہیں کیا جائے گا اور پولیس شراکت داروں اور عوام کے تعاون سے نقصان پہنچانے والوں کو انصاف کے کٹہرے میں لانے کے لیے پرعزم ہے۔
پولیس نے تصویر میں موجود شخص سے خود سامنے آنے یا اسے پہچاننے والے افراد سے اپیل کی ہے کہ وہ معلومات فراہم کریں۔
معلومات 101 پر کال کرکے 26*401643 کا حوالہ دے کر دی جاسکتی ہیں۔ شہری Crimestoppers کے ذریعے بھی گمنام اطلاع دے سکتے ہیں۔