(تکبیر نیوز—- پاکستان، اسلام آباد) پاکستان نے فی الحال عالمی اسپاٹ مارکیٹ سے ایل این جی کارگوز خریدنے سے گریز کرتے ہوئے کم ترین بولیاں بھی مسترد کر دی ہیں، کیونکہ حکومت کو قطر سے مزید سستی ایل این جی ملنے کی امید ہے۔
ذرائع کے مطابق Pakistan LNG Limited نے عالمی کمپنیوں کی جانب سے دی گئی کم ترین بولیوں کو قبول نہ کرنے کا فیصلہ کیا ہے۔
حکام کا کہنا ہے کہ BP Singapore اور TotalEnergies کی جانب سے دی گئی کم ترین بولیاں مسترد کیے جانے سے متعلق متعلقہ کمپنیوں کو آگاہ کر دیا گیا ہے۔
ذرائع کے مطابق پاکستان کو امید ہے کہ Qatar سے طویل مدتی معاہدے کے تحت مزید سستی ایل این جی حاصل ہو سکے گی، جس کے باعث اسپاٹ مارکیٹ سے فوری خریداری مؤخر کی گئی ہے۔
حکام کے مطابق پاکستان کو قطر سے دو ایل این جی کارگوز “ٹرم کنٹریکٹ” نرخ پر ملنے کی توقع ہے۔ ذرائع نے بتایا کہ قطر سے ایل این جی برینٹ خام تیل کی قیمت کے 13.37 فیصد ریٹ پر دستیاب ہو سکتی ہے۔
مزید بتایا گیا ہے کہ قطر کی جانب سے ایل این جی کارگوز کی دستیابی کے مثبت اشارے موصول ہوئے ہیں جبکہ ممکنہ کارگوز آبنائے ہرمز کے راستے پاکستان پہنچائے جائیں گے۔
توانائی ماہرین کے مطابق حکومت درآمدی گیس کی لاگت کم کرنے کیلئے اسپاٹ مارکیٹ کے بجائے طویل مدتی معاہدوں کو ترجیح دے رہی ہے تاکہ بجلی اور گیس کی پیداواری لاگت میں کمی لائی جا سکے۔
