بلیو بیج کا غلط استعمال، ڈرائیورز کو مجرمانہ سزا اور بھاری جرمانوں کی وارننگ

لندن (تکبیر نیوز):
برطانیہ کے شہر کروئیڈن میں بلیو بیج (Blue Badge) کے غلط استعمال پر ڈرائیورز کے خلاف سخت کارروائی شروع کر دی گئی ہے، جس کے تحت خلاف ورزی کرنے والوں کو نہ صرف بھاری جرمانوں بلکہ مجرمانہ سزا کا بھی سامنا کرنا پڑ سکتا ہے۔

برطانوی میڈیا رپورٹس کے مطابق مقامی کونسل اور ٹریفک حکام نے واضح کیا ہے کہ بلیو بیج صرف معذور افراد کی سہولت کے لیے مخصوص ہے اور اس کا غلط یا غیر قانونی استعمال ایک سنگین جرم تصور کیا جائے گا۔ حکام کا کہنا ہے کہ ایسے ڈرائیورز جو کسی معذور شخص کی غیر موجودگی میں بلیو بیج استعمال کرتے ہیں، یا کسی اور کے نام پر جاری بلیو بیج سے فائدہ اٹھاتے ہیں، ان کے خلاف قانونی کارروائی عمل میں لائی جائے گی۔

کروئیڈن کونسل کے مطابق حالیہ مہینوں میں بلیو بیج کے غلط استعمال کے کئی کیسز سامنے آئے ہیں، جس کے بعد نگرانی سخت کر دی گئی ہے۔ اگر کوئی شخص بلیو بیج جعلسازی، غلط استعمال یا دھوکہ دہی میں ملوث پایا گیا تو اسے ہزاروں پاؤنڈ جرمانہ، عدالتی پیشی اور مجرمانہ ریکارڈ کا سامنا کرنا پڑ سکتا ہے۔

حکام نے بتایا کہ بلیو بیج قوانین کے تحت:

• بلیو بیج صرف اسی معذور شخص کی موجودگی میں استعمال کیا جا سکتا ہے

• کسی اور کو فائدہ پہنچانے کے لیے بیج دینا جرم ہے

• فوت شدہ شخص کا بلیو بیج استعمال کرنا بھی غیر قانونی ہے

• جعلی یا ترمیم شدہ بلیو بیج رکھنے پر فوری ضبطی کی جا سکتی ہے

کونسل حکام کا کہنا ہے کہ بلیو بیج کا غلط استعمال حقیقی معذور افراد کے لیے مشکلات پیدا کرتا ہے، جو ان سہولیات کے اصل حقدار ہیں۔ اسی لیے ایسے عناصر کے خلاف زیرو ٹالرینس پالیسی اپنائی جا رہی ہے۔

ڈرائیورز کو ہدایت کی گئی ہے کہ وہ بلیو بیج قوانین کی مکمل پاسداری کریں، بصورت دیگر انہیں نہ صرف مالی نقصان بلکہ مستقل قانونی مسائل کا سامنا بھی کرنا پڑ سکتا ہے۔