آئل آف لیوس: ایک ہفتے سے لاپتہ دو ماہی گیروں کی تلاش دوبارہ شروع

تکبیر نیوز (آئل آف لیوس): اسکاٹ لینڈ کے آئل آف لیوس کے شمالی ساحل کے قریب ایک ہفتے سے زائد عرصے سے لاپتہ دو ماہی گیروں کی تلاش دوبارہ شروع کر دی گئی ہے۔

40 سالہ نارمن “ٹیم” مرے اور 23 سالہ مرڈو موریسن 13 اکتوبر کو اپنی کشتی کلڈا کے ساتھ لاپتہ ہوگئے تھے۔

ان کے تیسرے ساتھی ڈگلس کریگی، عمر 49 سال، کی لاش 14 اکتوبر کو رات تقریباً 2 بج کر 45 منٹ پر سمندر سے برآمد ہوئی تھی، تاہم باقی دونوں ماہی گیر اور کشتی تاحال لاپتہ ہیں۔

سمندری حالات کے باعث تلاش رکی تھی

پولیس اسکاٹ لینڈ کے مطابق خراب سمندری حالات اور اینکرنگ سے متعلق مشکلات کے باعث سرچ آپریشن عارضی طور پر روک دیا گیا تھا۔

بدھ کی صبح پولیس کی میرین اینڈ ڈائیو یونٹ اور دیگر متعلقہ اداروں نے پورٹ آف نیس کے قریب ایک مخصوص علاقے میں دوبارہ تلاش شروع کر دی۔

یہ وہی علاقہ ہے جہاں سے کشتی اور تینوں ماہی گیروں کے لاپتہ ہونے کی اطلاعات سامنے آئی تھیں۔

پولیس: آپریشن پیچیدہ ہے

ویسٹرن آئلز کے مقامی انسپکٹر نیل ٹیلر نے کہا کہ یہ ایک پیچیدہ آپریشن ہے اور متاثرہ خاندانوں کو جوابات فراہم کرنے کے لیے ہر ممکن کوشش کی جا رہی ہے۔

انہوں نے کہا کہ خاندان اس مشکل وقت میں اپنی رازداری برقرار رکھنے کی درخواست کر رہے ہیں۔

مقامی لوگوں کو خطرناک تلاش سے روک دیا گیا

پولیس نے مقامی کمیونٹی کی جانب سے مدد کی پیشکش کو سراہتے ہوئے خبردار کیا ہے کہ لوگ خود ایسے علاقوں میں تلاش کی کوشش نہ کریں جہاں انہیں نقصان پہنچنے کا خطرہ ہو۔

اگر کسی کے پاس ایسی معلومات ہوں جو ہنگامی اداروں کی مدد کر سکیں تو پولیس نے 101 پر رابطے کی اپیل کی ہے۔

حوالہ نمبر 3575 مورخہ 13 اکتوبر ہے۔

مخصوص علاقے میں پابندی

میرین ایکسیڈنٹ انویسٹی گیشن برانچ نے بٹ آف لیوس اور پورٹ آف نیس کے درمیان ایک مخصوص علاقے میں غوطہ خوروں اور کشتیوں کے لیے پابندی بھی نافذ کر رکھی ہے۔

متاثرہ خاندانوں کیلئے امدادی فنڈ

واقعے سے متاثرہ خاندانوں کے لیے شروع کیے گئے امدادی فنڈ میں اب تک تقریباً 65 ہزار پاؤنڈ جمع ہو چکے ہیں، جبکہ ہدف 1 لاکھ 10 ہزار پاؤنڈ مقرر کیا گیا ہے