تکبیر نیوز (فوکسٹون): برطانیہ کی کاؤنٹی کینٹ کے ساحلی شہر فوکسٹون میں Grand Burstin Hotel میں شدید آگ لگنے کے بعد عمارت کی مضبوطی متاثر ہونے کے خدشات پر قریبی رہائشی عمارت سے بھی 90 افراد کو عارضی طور پر منتقل کر دیا گیا ہے۔
ایمرجنسی سروسز کو ہفتہ کی صبح ایک بجے کے کچھ دیر بعد The Harbour، Folkestone میں واقع ہوٹل طلب کیا گیا، جہاں ابتدائی اطلاعات کے مطابق آگ ہوٹل کے تہہ خانے سے شروع ہوئی۔
کینٹ پولیس واقعے کی تحقیقات کر رہی ہے اور پولیس کا خیال ہے کہ آگ ممکنہ طور پر جان بوجھ کر لگائی گئی ہو سکتی ہے۔ تاہم تحقیقات ابھی جاری ہیں اور آگ لگنے کی حتمی وجہ کا تعین نہیں کیا گیا۔
خوش قسمتی سے واقعے میں کسی شخص کے زخمی ہونے کی اطلاع نہیں ملی۔
آگ لگنے کے بعد ہوٹل سے تقریباً 280 افراد کو بحفاظت نکال کر محفوظ مقام پر منتقل کیا گیا۔
بعد ازاں حفاظتی معائنہ کرنے والے ماہرین نے خدشہ ظاہر کیا کہ آگ کی شدت کے باعث ہوٹل کی عمارت کا ڈھانچہ کمزور ہوسکتا ہے۔
اسی خدشے کے پیش نظر ہفتہ 19 ستمبر کی شام قریبی Marine Terrace پر واقع Pavilion Court سے مزید 90 افراد کو گھر خالی کرنے کے لیے کہا گیا۔
Folkestone and Hythe District Council کے مطابق متاثرہ رہائشیوں کے لیے متبادل رہائش کا بندوبست کیا جا رہا ہے، جبکہ ہوٹل کی عمارت کا مزید تفصیلی معائنہ کیا جائے گا اور اسے محفوظ بنانے کے لیے ضروری کام کیے جائیں گے۔
کونسل کی چیف ایگزیکٹو Susan Priest نے کہا کہ یہ ہوٹل کے مہمانوں اور اپنے گھروں سے نکلنے پر مجبور ہونے والے مقامی رہائشیوں دونوں کے لیے انتہائی مشکل وقت ہے۔
انہوں نے متاثرین کی مدد کرنے والی تنظیموں اور اداروں کا شکریہ ادا کرتے ہوئے کہا کہ لوگوں کے لیے خوراک، گرم مشروبات اور دیگر ضروری سہولیات فراہم کی گئیں۔
Kent Fire and Rescue Service نے اتوار 20 ستمبر کو صبح ساڑھے گیارہ بجے جاری اپ ڈیٹ میں تصدیق کی کہ آگ بجھانے کی کارروائی مکمل ہو چکی ہے۔
Grand Burstin Hotel چلانے والے Britannia Hotels Group کے ترجمان کا کہنا ہے کہ کمپنی کینٹ پولیس کے ساتھ مکمل تعاون کر رہی ہے اور واقعے کی تحقیقات کے لیے درکار معلومات اور معاونت فراہم کی جائے گی۔
کمپنی کے مطابق ہوٹل کے مہمانوں اور عملے کی حفاظت اور فلاح ان کی اولین ترجیح ہے۔
کونسل نے Pavilion Court کے متاثرہ رہائشیوں کو بتایا ہے کہ پیر کے روز ہاؤسنگ افسران ان سے رابطہ کریں گے تاکہ آئندہ انتظامات سے آگاہ کیا جا سکے۔
کینٹ پولیس نے ایسے افراد سے بھی سامنے آنے کی اپیل کی ہے جنہوں نے واقعہ دیکھا ہو یا جن کے پاس علاقے کی متعلقہ سی سی ٹی وی یا ڈیش کیم فوٹیج موجود ہو، خصوصاً جمعہ کی رات 10 بجے سے ہفتہ رات ساڑھے 12 بجے کے درمیان کی ریکارڈنگ۔