تکبیر نیوز (بلسٹن): ویسٹ مڈلینڈز پولیس نے 17 جولائی کو بلسٹن میں آف روڈ بائیکس کے خلاف ایک بڑے آپریشن کے دوران نیشنل پولیس ایئر سروس (NPAS) کے ہیلی کاپٹر کی مدد سے دو مشتبہ افراد کو گرفتار کر لیا اور تین آف روڈ بائیکس ضبط کر لیں۔
پولیس کے مطابق اہلکاروں نے دو آف روڈ بائیکس کو ایک ساتھ چلتے ہوئے دیکھا، جن میں سے ایک پر رجسٹریشن پلیٹ موجود نہیں تھی جبکہ دوسری بائیک مبینہ طور پر ایک روز قبل چوری کی گئی تھی۔
ہیلی کاپٹر کی مدد سے چرچ اسٹریٹ پر ایک بائیک کو روک لیا گیا، جہاں 15 سالہ لڑکے کو حراست میں لے لیا گیا۔ دوسری بائیک کے سوار نے گرفتاری سے بچنے کے لیے ایک سڑک پر الٹی سمت میں گاڑی چلائی، بعد ازاں فٹ پاتھ پر جا کر بائیک چھوڑ دی اور پیدل فرار ہونے کی کوشش کی، تاہم پولیس نے اسے بھی گرفتار کر لیا۔
پولیس نے 25 سالہ شخص پر متعدد الزامات عائد کیے ہیں، جن میں نااہلی کے باوجود گاڑی چلانا، لاپرواہی سے ڈرائیونگ، مالک کی اجازت کے بغیر گاڑی استعمال کرنا، پولیس کو نہ روکنا اور بھنگ رکھنے کے الزامات شامل ہیں۔ انہیں 27 اگست کو ڈڈلی مجسٹریٹس کورٹ میں پیش ہونے کے لیے ضمانت پر رہا کر دیا گیا ہے۔
دوسری جانب 15 سالہ لڑکے کو بھی مزید تحقیقات مکمل ہونے تک ضمانت پر رہا کیا گیا ہے۔
اسی کارروائی کے دوران ایک تیسری آف روڈ بائیک بھی ضبط کی گئی۔ ویسٹ مڈلینڈز پولیس کے مطابق تینوں بائیکس کو آئندہ غلط استعمال روکنے کے لیے تباہ (Crushed) کر دیا جائے گا۔
بلسٹن اینڈ ایسٹ پارک پولیس کی انسپکٹر ایما کلارک نے کہا کہ پولیس ایسے افراد کے خلاف کارروائیاں جاری رکھے گی جو عوامی مقامات پر خطرناک انداز میں آف روڈ بائیکس چلا کر شہریوں کے لیے پریشانی اور خطرہ پیدا کرتے ہیں۔
ادھر وولورہیمپٹن سٹی کونسل کے کابینہ رکن اوبیدہ احمد نے بھی اس کارروائی کا خیرمقدم کرتے ہوئے عوام سے اپیل کی کہ اگر وہ ایسے جرائم یا مشتبہ افراد کے بارے میں معلومات رکھتے ہوں تو پولیس کو ضرور آگاہ کریں۔