نیوکاسل اَنڈر لائم میں ڈرائیو وے پر حملہ، بی ایم ڈبلیو چھین کر فرار

(تکبیر نیوز—- برطانیہ، اسٹافورڈشائر)

برطانیہ کے علاقے نیوکاسل اَنڈر لائم میں علی الصبح ایک شہری کو اس کے گھر کے باہر تشدد کا نشانہ بنا کر اس کی قیمتی بی ایم ڈبلیو گاڑی چھین لی گئی، جبکہ پولیس نے واقعے کی تحقیقات شروع کر دی ہیں۔

اسٹافورڈشائر پولیس کے مطابق واقعہ جمعہ 12 جون کی صبح تقریباً 4 بج کر 40 منٹ پر ویسٹ لینڈز کے علاقے سی برج لین کے قریب پیش آیا۔

پولیس کا کہنا ہے کہ گاڑی کا مالک اپنے گھر کے باہر موجود تھا جب مشتبہ افراد نے اس پر حملہ کر دیا۔ حملے کے بعد ملزمان اس کی BMW X6M گاڑی لے کر اسٹوک آن ٹرینٹ کی جانب فرار ہو گئے۔

متاثرہ شخص کے چہرے پر معمولی نوعیت کی چوٹیں آئیں، تاہم اسے موقع پر طبی امداد فراہم کی گئی۔

پولیس کے مطابق واردات کے تقریباً آدھے گھنٹے بعد روڈ کرائم ٹیم نے چوری شدہ گاڑی کو اسٹوک آن ٹرینٹ کے علاقے سمال تھورن میں واقع کلف اسٹریٹ سے لاوارث حالت میں برآمد کر لیا۔

تحقیقات کے دوران معلوم ہوا ہے کہ واقعے میں ملوث افراد کی عمر 25 سال سے کم تھی اور وہ سیاہ رنگ کے کپڑوں میں ملبوس تھے۔ پولیس کے مطابق ایک مشتبہ شخص کا قد تقریباً 5 فٹ 8 انچ سے 5 فٹ 10 انچ کے درمیان تھا۔

پولیس اہلکار علاقے میں گھر گھر جا کر معلومات اکٹھی کر رہے ہیں اور قریبی سی سی ٹی وی، ڈیش کیم اور ڈور بیل کیمروں کی فوٹیج کا بھی جائزہ لیا جا رہا ہے۔

حکام نے عوام سے اپیل کی ہے کہ اگر کسی نے واقعے کے وقت کوئی مشکوک سرگرمی دیکھی ہو یا اس کے پاس متعلقہ ویڈیو ریکارڈنگ موجود ہو تو فوری طور پر پولیس سے رابطہ کرے۔