(تکبیر نیوز—- برطانیہ، نارتھمبرلینڈ)
برطانیہ میں ایک افسوسناک واقعے نے پوری پولیس فورس اور مقامی کمیونٹی کو سوگ میں مبتلا کر دیا، جہاں صرف 19 سالہ خاتون پولیس افسر دورانِ ڈیوٹی گاڑی کی ٹکر سے شدید زخمی ہونے کے بعد اسپتال میں دم توڑ گئیں۔
نارتھمبریا پولیس نے تصدیق کی ہے کہ پولیس کانسٹیبل جیس ٹرن بل، جو گزشتہ سال ستمبر میں فورس میں شامل ہوئی تھیں، پیر کی رات نارتھمبرلینڈ کے علاقے کراملنگٹن میں اے 189 شاہراہ پر ایک حادثے کی اطلاع پر پہنچیں تو انہیں ایک سیاہ رنگ کی مرسڈیز سی ایل سی گاڑی نے ٹکر مار دی۔
پولیس کے مطابق مذکورہ گاڑی ابتدائی حادثے میں شامل نہیں تھی، تاہم موقع پر موجود افسر کو ٹکر لگنے سے وہ شدید زخمی ہو گئیں۔ انہیں فوری طور پر اسپتال منتقل کیا گیا جہاں کئی روز تک زندگی کی جنگ لڑنے کے بعد وہ اپنے اہل خانہ کی موجودگی میں انتقال کر گئیں۔
نارتھمبریا پولیس کی چیف کانسٹیبل Vanessa Jardine نے جیس ٹرن بل کو خراجِ عقیدت پیش کرتے ہوئے کہا کہ یہ انتہائی المناک واقعہ ہے کیونکہ ایک نوجوان افسر نے اپنی کمیونٹی کی حفاظت کرتے ہوئے جان قربان کر دی۔
انہوں نے کہا کہ جیس ایک محنتی، فرض شناس اور عوامی خدمت کے جذبے سے سرشار افسر تھیں جو ہمیشہ لوگوں کی حفاظت کے لیے اپنی ذمہ داریاں احسن طریقے سے انجام دیتی تھیں۔ ان کے بقول پولیس افسران روزانہ عوام کی حفاظت کے لیے خطرات کا سامنا کرتے ہیں اور جیس نے اس راہ میں سب سے بڑی قربانی دی۔
واقعے کے بعد نارتھمبریا پولیس کے ہیڈکوارٹر پر قومی پرچم سرنگوں کر دیا گیا جبکہ پورے علاقے میں غم کی فضا قائم ہے۔
پولیس کے مطابق 73 سالہ ایک شخص کو موقع پر خطرناک ڈرائیونگ کے ذریعے شدید چوٹ پہنچانے کے شبہے میں گرفتار کیا گیا تھا۔ بعد ازاں جیس ٹرن بل کی وفات کے بعد اسے خطرناک ڈرائیونگ کے ذریعے موت کا سبب بننے کے الزام میں دوبارہ گرفتار کیا گیا۔ تاہم ابتدائی تفتیش کے بعد اسے ضمانت پر رہا کر دیا گیا ہے۔
پولیس اینڈ کرائم کمشنر Susan Dungworth نے بھی گہرے دکھ کا اظہار کرتے ہوئے کہا کہ جیس نے دوسروں کی خدمت کو اپنی زندگی کا مقصد بنایا تھا اور ان کی موت پولیس افسران کو درپیش روزمرہ خطرات کی یاد دہانی ہے۔
پولیس نے واقعے کی تحقیقات جاری رکھتے ہوئے عوام سے اپیل کی ہے کہ اگر کسی کے پاس حادثے سے متعلق معلومات یا ویڈیو ریکارڈنگ موجود ہو تو وہ فوری طور پر تفتیشی حکام سے رابطہ کرے۔