ایلون مسک نے ایئر ہوسٹس کو ہراساں کرنے کی تردید کردی
ایلون مسک نے ایئر ہوسٹس کو ہراساں کرنے کی تردید کردی
ٹیسلا اوراسپیس ایکس کے بانی ایلون مسک نے ایئر ہوسٹس کو ہراساں کرنے کی خبر کو سیاسی قرار دیتے ہوئے اس کی تردید کردی ہے۔
غیر ملکی خبر رساں ادارے کے مطابق ٹیسلا اوراسپیس ایکس کے مالک ایلون مسک کے بارے میں یہ انکشاف سامنے آیا تھا کہ انہوں نے پرائیوٹ جیٹ کی ایئر ہوسٹس کو جنسی طور پر ہراساں کرنے کی کوشش کی تھی۔
رپورٹ میں کہا گیا ہے کہ ایلون مسک نے اس معاملے کو دبانے کے لیے ایئر ہوسٹس کو ڈھائی لاکھ ڈالر کی رقم ادا کی تھی۔
یہ بھی پڑھیں: جعلی اکاؤنٹس پر ٹوئٹر کی وضاحت تک معاہدے میں پیش رفت نہیں ہوگی، ایلون مسک
تاہم اب ایلون مسک کا بیان سامنے آگیا ہے جس میں انہوں نے اس خبر کی تردید کی ہے جبکہ انہوں نے اس رپورٹ کو سیاسی قرار دیا ہے۔
اس حوالے سے ان کا کہنا تھا کہ اس اسٹوری میں بھی اور بھی بہت کچھ ہے، اگر میں جنسی طور پر ہراساں کرنے کی طرف مائل ہوتا تو یہ ممکن نہیں تھا کہ میرے 30 سالہ کیریئر میں یہ بات چھپی رہتی۔
رپورٹ کے مطابق ایلون مسک کی یہ رپورٹ سامنے آنے کے بعد انہوں نے ٹوئٹ کرتے ہوئے اپنے ردعمل میں کہا تھا کہ اب وہ ری پبلکن کو ووٹ دیں گے۔
واضح رہے کہ ایلون مسک ماضی میں ڈیموکریٹس کو ووٹ دیتے آئے ہیں جبکہ ایلون مسک کی کمپنی اسپیس ایکس نے بھی خاتون کو رقم کی ادائیگی کی تردید کردی ہے۔
یہ بھی پڑھیں: ٹوئٹر اور ایلون مسک کے درمیان ہونے والا دنیا کا سب سے بڑاکاروباری معاہدہ تعطل کا شکار
دوسری جانب مبینہ طور پر ہراسیت کا شکار ہونے والی ایئرہوسٹس کی دوست کا کہنا ہے کہ انہوں نے خود اس واقعے کے بارے میں بتایا تھا کہ ایلون مسک نے ان کو ہراساٰن کیا ہے۔
خیال رہے کہ بزنس انسائیڈر کی رپورٹ میں یہ دعوی کیا گیا ہے کہ ایئر ہوسٹس اور ان کی دوست نے کچھ ایسی دستاویزات بھی شیئر کی ہیں جس سے کہانی کو تقویت ملتی ہے۔