برمنگھم میں خیراتی دکان پر حملہ، لیپ ٹاپ اور عطیات کا ڈبہ چوری، ہزاروں پاؤنڈ کا نقصان

تکبیر نیوز، برمنگھم: برمنگھم کے علاقے ہاربورن میں واقع ایک خیراتی دکان میں چوری کی واردات نے عملے اور رضاکاروں کو صدمے سے دوچار کر دیا۔ نامعلوم افراد دکان کا دروازہ توڑ کر اندر داخل ہوئے، ہزاروں پاؤنڈ مالیت کا نقصان پہنچایا اور لیپ ٹاپ سمیت عطیات جمع کرنے والا ڈبہ بھی چوری کر کے فرار ہو گئے۔

اطلاعات کے مطابق واردات 16 جون کو ہاربورن ہائی اسٹریٹ پر قائم ایک معروف خیراتی ادارے کی دکان میں پیش آئی۔ چوروں نے دکان کے شیشے والے مرکزی دروازے کو شدید نقصان پہنچاتے ہوئے اندر گھس کر سامان کی توڑ پھوڑ کی اور مختلف اشیاء کی تلاشی لی۔

خیراتی ادارے کے حکام کے مطابق چوری ہونے والے سامان میں ایک لیپ ٹاپ اور عطیات کا ڈبہ شامل ہے، جبکہ دروازے اور دیگر سامان کو پہنچنے والے نقصان سمیت مجموعی مالی نقصان تقریباً 3 ہزار پاؤنڈ تک جا پہنچا ہے۔

واقعے کے بعد دکان کو اگلے روز بند رکھنا پڑا تاکہ صفائی ستھرائی اور نقصان کا جائزہ لیا جا سکے۔ دکان کی بندش کے باعث ادارے کو ایک دن کی آمدن سے بھی محروم ہونا پڑا، جس سے فلاحی سرگرمیوں پر اثر پڑنے کا خدشہ ظاہر کیا جا رہا ہے۔

خیراتی ادارے کے ذمہ داران نے واقعے پر گہرے دکھ اور افسوس کا اظہار کرتے ہوئے کہا کہ دکان سے حاصل ہونے والی آمدنی دماغی چوٹوں کا شکار افراد کی بحالی اور معاونت پر خرچ کی جاتی ہے۔ ان کا کہنا تھا کہ رضاکار اور عملہ بڑی محنت سے اس مقام کو کمیونٹی کے لیے خوش آمدید کہنے والی جگہ بناتے ہیں، لیکن اس واقعے نے سب کو مایوس کر دیا ہے۔

ادارے کے نمائندے نے چوری کی واردات کو انتہائی افسوسناک قرار دیتے ہوئے کہا کہ یہ بات سمجھ سے بالاتر ہے کہ کوئی شخص ایسے ادارے کو نشانہ بنائے جو ضرورت مند افراد کی مدد کے لیے کام کر رہا ہو۔

پولیس واقعے کی تحقیقات کر رہی ہے اور ملزمان کی تلاش جاری ہے۔ مقامی افراد نے بھی خیراتی دکان کے ساتھ اظہارِ یکجہتی کرتے ہوئے ذمہ داروں کی جلد گرفتاری کا مطالبہ کیا ہے۔