(تکبیر نیوز—- برطانیہ، اسٹافورڈ) اسٹافورڈ میں 60 سالہ شخص پر قاتلانہ حملے کی تحقیقات کرنے والی پولیس نے مشتبہ حملہ آور کی نئی سی سی ٹی وی ویڈیوز جاری کر دی ہیں۔
اسٹافورڈ شائر پولیس کے مطابق پہلی ویڈیو 14 مئی کی شام تقریباً 6 بج کر 36 منٹ پر ریکارڈ ہوئی جبکہ دوسری فوٹیج حملے کے کچھ دیر بعد شام 7 بجے کے قریب کیسل فیلڈز علاقے میں بنائی گئی۔
پولیس کا کہنا ہے کہ ویڈیو میں نظر آنے والے شخص کا رویہ انتہائی اہم ہے کیونکہ اسے حملے کے بعد موقع سے بھاگتے دیکھا گیا۔
واقعہ نیوپورٹ روڈ کے قریب پیش آیا جہاں کیسل گالف اینڈ لیزر سینٹر کے قریب تشدد کی اطلاع پر پولیس کو طلب کیا گیا تھا۔
ایک شہری نے 60 سال سے زائد عمر کے زخمی شخص کو ٹاؤن سینٹر کے قریب ایک بینچ پر پایا تھا۔
متاثرہ شخص کو شدید زخمی حالت میں اسپتال منتقل کیا گیا جہاں وہ اب بھی تشویشناک مگر مستحکم حالت میں زیر علاج ہے۔
ڈیٹیکٹو چیف انسپکٹر ایان فٹزجیرالڈ نے کہا کہ تحقیقات تیزی سے آگے بڑھ رہی ہیں اور پہلے سامنے آنے والی عوامی معلومات کی بدولت مزید واضح سی سی ٹی وی حاصل ہوئی ہے۔
انہوں نے کہا:
“ہمیں اب بھی عوام کی مدد درکار ہے، اگر کوئی اس شخص کو پہچانتا ہے تو فوری رابطہ کرے کیونکہ معمولی معلومات بھی انتہائی اہم ثابت ہو سکتی ہیں۔”
پولیس نے شہریوں سے اپیل کی ہے کہ اگر کسی شخص کے جسم پر پراسرار زخم ہوں یا اس کا رویہ غیر معمولی نظر آئے تو فوری اطلاع دی جائے۔
حکام کے مطابق حملے کے بعد کیسل فیلڈز اور اطراف کے علاقوں میں پولیس کی اضافی نفری تعینات کر دی گئی ہے جبکہ اسپیشلسٹ سرچ ٹیمیں بھی تحقیقات میں مصروف ہیں۔