کاؤنٹی ڈرہم: اے 66 ٹریفک حادثے میں جاں بحق ہونے والے ایک نوجوان کی یاد میں منعقدہ تقریب کے دوران متعدد گاڑیوں کو آگ لگا دی گئی، جبکہ مڈلزبرو اور گردونواح میں حالیہ پرتشدد واقعات کے بعد پولیس کی بھاری نفری تعینات کر دی گئی ہے۔
سوشل میڈیا پر سامنے آنے والی ویڈیوز میں کاؤنٹی ڈرہم کے علاقے ہیزویل میں کئی گاڑیوں کو آگ کی لپیٹ میں دیکھا جا سکتا ہے۔ اطلاعات کے مطابق یہ اجتماع اے 66 حادثے میں جاں بحق ہونے والے 23 سالہ مائیکل کیہل کی یاد میں منعقد کیا گیا تھا، جہاں بڑی تعداد میں لوگ جمع ہوئے اور غبارے بھی فضا میں چھوڑے گئے۔
ویڈیوز میں اجتماع کے دوران گاڑیوں کو میدان میں تیز رفتاری سے گھومتے اور بعد ازاں کئی گاڑیوں کو جلتے ہوئے دیکھا گیا۔ بعد میں مزید ویڈیوز میں ٹریکٹر کی مدد سے جلی ہوئی گاڑیوں کو جائے وقوعہ سے ہٹاتے ہوئے دکھایا گیا۔
جمعہ کو جائے وقوعہ پر آتش بازی کے باقیات، دھوئیں کے کنستر اور غبارے بھی موجود تھے، جبکہ زمین پر گاڑیوں کے جلنے کے واضح نشانات دیکھے گئے۔ گاڑیوں کو وہاں سے ہٹا دیا گیا، تاہم ایک گاڑی کے اگلے حصے کا بمپر وہیں موجود تھا۔
یہ واقعہ ایسے وقت میں پیش آیا ہے جب مڈلزبرو کے علاقے میں مسلسل پرتشدد واقعات کے بعد 200 سے زائد اضافی پولیس اہلکار تعینات کیے گئے ہیں۔
مڈلزبرو اور تھورنابی ایسٹ سے رکنِ پارلیمنٹ اینڈی میکڈونلڈ نے علاقے میں جاری صورتحال کو انتہائی سنگین قرار دیتے ہوئے کہا کہ بعض شہری اپنی ہی گھروں میں خود کو محصور محسوس کر رہے ہیں۔ انہوں نے موجودہ صورتحال کو دہشت گردی قرار دیتے ہوئے مناسب اور مؤثر کارروائی کا مطالبہ کیا۔
اے 66 حادثے میں دو پولیس اہلکاروں 37 سالہ پی سی میتھیو بلیڈز اور 38 سالہ پی سی ٹام کلو سمیت پانچ نوجوان جاں بحق ہوئے تھے۔ حادثے میں 17 سالہ کول ورتھی، 17 سالہ تھیو رائے، 18 سالہ مکائی سیڈنگٹن، 23 سالہ مائیکل کیہل اور 23 سالہ جاکوب ماتوسیاک بھی جان سے گئے۔
پولیس نے اے 66 حادثے کے بعد مجموعی طور پر 17 افراد کو گرفتار کیا ہے۔ پولیس کے مطابق تحقیقات مبینہ منظم جرائم کے حوالے سے بھی جاری ہیں۔
جمعہ کو کلیولینڈ پولیس نے بتایا کہ پیر کو گرفتار کیے گئے 21 سالہ کائی انیکو پر کلاس بی منشیات کو سپلائی کرنے کی نیت سے رکھنے کا الزام عائد کیا گیا ہے۔
پولیس نے یہ بھی بتایا کہ پیر کو گرفتار کیے گئے مزید چار افراد کو ضمانت پر رہا کر دیا گیا ہے، جن میں 16 سالہ لڑکا، 18 سالہ نوجوان، 55 سالہ شخص اور 23 سالہ شخص شامل ہیں۔
ادھر مڈلزبرو کے قریب گرین ٹاؤن میں ایک گھر میں آتشزدگی کے واقعے کی تحقیقات بھی جاری ہیں، جس میں 34 سالہ نٹالی میکڈونلڈ اور ان کی سات سالہ بھانجی ویلینٹینا فوسٹر ہلاک جبکہ چار افراد زخمی ہوئے تھے۔
نٹالی میکڈونلڈ کے بھائی جوش کرٹن نے کہا کہ ان کی بہن کا جرائم پیشہ گروہوں یا اے 66 حادثے سے کوئی تعلق نہیں تھا، اور ان کے مطابق یہی بات اس سانحے کو مزید بے معنی بناتی ہے۔
پولیس نے کہا ہے کہ اے 66 حادثے اور گرین ٹاؤن میں ہونے والی آتشزدگی کے درمیان ممکنہ تعلق کو ابھی خارج نہیں کیا گیا، تاہم تحقیقات جاری ہیں۔