تکبیر نیوز (لندن): برطانیہ کی سیاسی فضا میں ایک بڑا موڑ اس وقت آیا جب ریفارم یو کے کے سربراہ نائجل فراج نے کلیکٹن سے رکن پارلیمنٹ کی نشست سے استعفیٰ دینے اور دوبارہ اسی نشست پر ہونے والے ضمنی انتخاب میں حصہ لینے کا اعلان کر دیا۔ ان کا کہنا ہے کہ ان کے خلاف مالی معاملات پر جاری تنازع کا فیصلہ میڈیا یا سیاسی مخالفین نہیں بلکہ کلیکٹن کے عوام کریں گے۔
نائجل فراج نے ایک ویڈیو بیان میں کہا کہ انہوں نے کوئی قانون نہیں توڑا، نہ ہی عوامی خزانے کا غلط استعمال کیا ہے۔ ان کے مطابق حالیہ پارلیمانی تحقیقات کو سیاسی ہتھیار کے طور پر استعمال کیا جا رہا ہے، اس لیے وہ چاہتے ہیں کہ عوام براہِ راست ان کے حق میں یا خلاف فیصلہ دیں۔
فراج نے کہا کہ یہ ضمنی انتخاب ووٹروں کے لیے اسٹیبلشمنٹ کو واضح پیغام دینے کا موقع ہوگا۔
پانچ ملین پاؤنڈ کے تحفے پر تحقیقات
فراج اس وقت پارلیمنٹ کے اسٹینڈرڈز کمشنر کی تحقیقات کا سامنا کر رہے ہیں۔ ان پر الزام ہے کہ انہوں نے رکن پارلیمنٹ منتخب ہونے سے قبل ایک بڑے سرمایہ کار اور ریفارم یو کے کے مالی معاون کی جانب سے ملنے والے 50 لاکھ پاؤنڈ کے تحفے کا بروقت اندراج نہیں کیا۔
اس کے علاوہ ایک اور سیاسی اتحادی کی جانب سے فراہم کی جانے والی سکیورٹی، سوشل میڈیا عملے اور رہائش جیسی سہولیات بھی زیر بحث ہیں، جنہیں مبینہ طور پر پارلیمانی قواعد کے مطابق ظاہر نہیں کیا گیا۔
فراج کا مؤقف ہے کہ یہ تمام معاونت ذاتی نوعیت کی تھی اور قانون کے مطابق اس کا اندراج ضروری نہیں تھا۔
اپوزیشن جماعتوں کا انتخابی بائیکاٹ
دلچسپ پیش رفت یہ ہے کہ لیبر پارٹی، کنزرویٹو پارٹی، لبرل ڈیموکریٹس، گرین پارٹی اور ری اسٹور برطانیہ نے اعلان کیا ہے کہ وہ اس ضمنی انتخاب میں اپنا امیدوار میدان میں نہیں اتاریں گے۔
لیبر پارٹی نے اس فیصلے کو "سیاسی تماشہ” قرار دیتے ہوئے کہا کہ وہ اس کا حصہ نہیں بننا چاہتی، جبکہ کنزرویٹو رہنما نے اسے عوام کی توجہ اصل معاملات سے ہٹانے کی کوشش قرار دیا۔
تحقیقات پر کیا اثر پڑے گا؟
پارلیمانی قواعد کے مطابق نائجل فراج کے استعفے کے بعد ان کے خلاف جاری اسٹینڈرڈز کمشنر کی موجودہ تحقیقات عارضی طور پر معطل ہو جائیں گی۔ اگر وہ دوبارہ منتخب ہو کر پارلیمنٹ واپس آتے ہیں تو یہی تحقیقات دوبارہ شروع کی جائیں گی۔
ماہرین کے مطابق اگر تحقیقات کے نتیجے میں انہیں معطل کیا جاتا ہے تو بعد ازاں ریکال پٹیشن کا عمل بھی شروع ہو سکتا ہے، جس کے ذریعے عوام کسی رکن پارلیمنٹ کو دوبارہ ہٹانے کا اختیار رکھتے ہیں۔
سیاسی اہمیت
نائجل فراج نے 2024 کے عام انتخابات میں پہلی مرتبہ کلیکٹن سے کامیابی حاصل کی تھی اور اب وہ اپنی سیاسی مقبولیت کو ایک بار پھر عوامی ووٹ کے ذریعے ثابت کرنے کی کوشش کر رہے ہیں۔ دوسری جانب مخالف جماعتوں کا انتخاب نہ لڑنے کا فیصلہ بھی برطانوی سیاست میں ایک غیر معمولی پیش رفت قرار دیا جا رہا ہے۔