اقلیتوں کے حقوق کی حفاظت ریاست کی ذمہ داری ہے، پرویزالہٰی

9

وزیراعلیٰ پنجاب پرویزالہٰی نے کہا ہے کہ اقلیتوں کے حقوق کی حفاظت ریاست کی ذمہ داری ہے۔

تفصیلات کے مطابق دیوالی کے تہوار کی مناسبت سے وزیراعلیٰ آفس میں خصوصی تقریب کا انعقاد کیا گیا جہاں وزیراعلیٰ پنجاب پرویزالہٰی نے ہندو اوردیگر اقلیتی برادریوں کے ساتھ مل کر کیک کاٹا۔

چودھری پرویز الہٰی نے دیوالی کے تہوار کی مناسبت کے حوالے سے پاکستان میں مقیم ہندو برادری کو مبارکباد دی۔

 اس موقع پر وزیراعلیٰ پنجاب پرویزالہٰی نے کہا کہ دیوالی پر ہندو برادری کی خوشیوں میں شریک ہیں، اقلیتی برادری کے طلباء کو سرکاری تعلیمی اداروں میں میٹرک سے پی ایچ ڈی تک سکالر شپ دیئے جا رہے ہیں۔

انہوں نے کہا کہ اقلیتی برادری کیلئے اعلیٰ تعلیمی اداروں میں 2 فیصدکوٹہ مقرر کیا ہے، اقلیتی برادری کیلئے ملازمتوں میں 5 فیصد کوٹے پر عملدرآمد کیلئے ہدایات جاری کردی ہیں۔

پرویزالہٰی نے یہ بھی کہا کہ اقلیتی طلباء کیلئے ایجوکیشنل سکالر شپ سکیم میں 50 فیصد سنٹرل پنجاب، 35 فیصد جنوبی پنجاب اور 15 فیصد شمالی پنجاب کے طلباء کو دیئے جا رہے ہیں۔

ان کا کہنا تھا کہ میٹرک سے اعلیٰ تعلیم تک 50 فیصد نمبر حاصل کرنے والے ا قلیتی طلباء کو 50 ہزار روپے تک سکالر شپ دے رہے ہیں، ایک دوسرے کی خوشیوں میں شرکت سے رواداری اور بھائی چارے کو فروغ ملتا ہے۔

پرویزالہٰی کا یہ بھی کہنا تھا کہ اقلیتوں کے حقوق کی حفاظت ریاست کی ذمہ داری ہے، ہندو برادری سمیت تمام اقلیتوں کو یکساں حقوق حاصل ہیں۔

وزیراعلیٰ پنجاب پرویزالہٰی کا مزید کہنا تھا کہ ہندو اور دیگر اقلیتی برادریوں کو تعلیم کیلئے مساوی مواقع فراہم کئے جا رہے ہیں، اقلیتوں سے بہتر سلوک اور احترام دین اسلام کا خاصا ہے۔

مزید پڑھیں:  عمران نیازی کا پاک فوج کو بدنام کرنا انتہائی قابل مذمت ہے، وزیراعظم

ارکان صوبائی اسمبلی یوڈسٹر چوہان، نوازچانڈیا،عباس علی شاہ،محمد شفیق، ہبکوک رفیق بابو، سیموئل یعقوب، مہندر پال سنگھ، سائرہ رضا، فوزیہ عباس، شاہدہ ملیکہ، نوہیس کھوکھر، آفتاب گل، محمد یاسین،چیئرمین وزیراعلیٰ شکایت سیل زبیر احمدخان، سیکرٹری اقلیتی امور وانسانی حقوق اور متعلقہ حکام بھی اس موقع پر موجود تھے۔

جواب چھوڑیں

آپ کا ای میل ایڈریس شائع نہیں کیا جائے گا.