بھارت میں ہنگامہ آرائی، اگنی پتھ اسکیم کیا ہے؟

بھارت میں ہنگامہ آرائی، اگنی پتھ اسکیم کیا ہے؟

بھارت میں ہنگامہ آرائی اور حکمراں جماعت کے رہنماؤں کے گھروں پر حملے کا سبب بننے والی اگنی پتھ اسکیم کیا ہے۔

بھارت میں حکمراں جماعت بھارتیہ جنتا پارٹی کی اگنی پتھ اسکیم کے خلاف آج بروز جمعہ کو بھی متعدد ریاستوں میں پرتشدد مظاہرے جاری ہیں جبکہ مشتعل افراد نے ریاست بہار کے ڈپٹی وزیر اعلیٰ رینو دیوی اور پارٹی کے ریاستی صدر چمپرن سنجے جیوال کے گھروں پر بھی حملہ کیا ہے۔

علاوہ ازیں بھارتی ریاست اترپردیش، بہار، ہریانہ اور تیلنگنا میں کئی ٹرینوں کو بھی نذر آتش کردیا گیا ہے جبکہ ریاست ہریانہ نے امن و امان کی خراب صورت حال کے پیش نظر متعدد علاقوں میں انٹرنیٹ سروس بھی بند کردی ہے۔

پرتشدد مظاہروں کے دوران 200 سے زائد ٹرینیں معطل یا منسوخ کر دی گئی ہیں جبکہ ریاست تیلنگنا میں پولیس کی مبینہ فائرنگ سے ایک شخص بھی ہلاک ہوگیا ہے۔

اگنی پتھ اسکیم کیا ہے؟

منگل کو بھارت کے وزیر اعظم نریندر مودی نے اگنی پتھ اسکیم کا اعلان کیا تھا جس کا مقصد بھارتی فورسز کی تنخواہوں اور پینشنز کے بجٹ کو کم کرنا تھا۔

اس اسکیم کے تحت ساڑھے 17 سال سے 21 سال تک کی عمر کے نوجوان لڑکے اور لڑکیوں کو فوج میں چار سال کے لیے بھرتی کیا جائے گا اور مدت کے اختتام کے بعد ان سب میں سے صرف 25 فیصد افراد کی مدت ملازمت ہی بڑھائی جائے گی۔

بعد ازاں ملک بھر میں مظاہروں کے بعد بھارتی حکومت نے عمر کی حد کو بڑھاتے ہوئے 23 سال کردیا تھا جبکہ اس سکیم کے تحت فوج میں بھرتی ہونے والے افراد ’اگنی ویر‘ کہلائے جائیں گے۔

ملازمت کے اختتام پر ان نوجوان لڑکے اور لڑکیوں کو 11 سے 12 لاکھ روپے دیے جائیں گے جس کے بعد وہ پینشن وصول کرنے کے اہل نہیں ہوں گے۔

دوسری جانب بھارت میں اپوزیشن جماعت کے رہنما راہول گاندھی کا اگنی پتھ اسکیم پر تنقید کرتے ہوئے کہنا تھا کہ اس اسکیم کو نوجوانوں نے مسترد کردیا ہے۔

انہوں نے لکھا کہ وزیر اعظم نہیں سمجھتے کہ ملک کے لوگ کیا چاہتے ہیں کیونکہ وہ اپنے دوستوں کی آوازوں کے علاوہ کچھ اور سننا نہیں چاہتے ہیں۔

واضح رہے کہ اس اگنی پتھ اسکیم کے خلاف صرف عام لوگ اور سیاستدان ہی سراپا احتجاج نہیں ہیں بلکہ سابق فوجی افسران بھی مظاہرین میں شامل ہیں۔