بھارت میں نبی پاک ﷺکی شان میں گستاخی کیخلاف سکھ کمیونٹی کا مظاہروں کا اعلان
بھارت میں نبی پاک ﷺکی شان میں گستاخی کیخلاف سکھ کمیونٹی نے مظاہروں کا اعلان کیا ہے۔
سکھ فار جسٹس نے اعلان کیا ہے کہ 17 جون کو دنیا بھر میں بھارتی سفارت خانوں کا گھیراؤ کیا جائے گا۔
سکھ فار جسٹس کا کہنا ہے کہ قطر، اومان، کویت، مصر، ملائیشیا میں بھارتی سفارتخانوں کے سامنے مظاہرہ کریں گے جبکہ متحدہ عرب امارات، لبنان، لیبیا، انڈونیشیا، آسٹریلیا میں سکھ مظاہرے کریں گے۔
اس کے علاوہ برطانیہ، یورپی یونین، امریکا، کینیڈا میں بھارتی سفارتخانوں کو گھیراؤ کیا جائے گا۔
سکھ فار جسٹس کا کہنا تھا کہ ہم سکھ ہیں مگر رسول پاک ﷺکی گستاخی برداشت نہیں کریں گے، 17 جون کو مسلمان بھائی جمعے کی نماز کے بعد مسلمان، سکھ کمیونٹی کے ساتھ مل کر بھارتی سفارتخانوں کو گھیراؤ کرے گے۔
واضح رہے کہ رواں مہینے کے آغاز میں وزیراعظم نریندر مودی کی بھارتیہ جنتا پارٹی کے کی سابق ترجمان نوپور شرما نے ایک نیوز چینل پر بحث کے دوران پیغمبر اسلام ﷺ کے خلاف توہین آمیز تبصرہ کیا تھا جبکہ ایک اور سابق ترجمان نوین کمار نے سوشل میڈیا پر توہین آمیز تبصرے کیے تھے جس کی وجہ سے مسلمانوں کے جذبات کو ٹھیس پہنچی۔
بی جے پی نے دونوں اراکین کو معطل کرکے کہا تھا کہ پارٹی کسی بھی مذہب کی توہین کی مذمت کرتی ہے۔ پولیس نے دونوں اراکین کے خلاف مقدمات بھی درج کیے ہیں تاہم مشتعل مسلمان بی جے پی ترجمانوں کی گرفتاری کے لیے احتجاج کرتے رہے۔