برٹن میں بے گھر شخص کے چہرے پر چاقو سے خوفناک حملہ

(تکبیر نیوز—- برطانیہ، برٹن) برطانیہ کے شہر برٹن اَپون ٹرینٹ میں ایک بے گھر شخص پر انتہائی خوفناک حملے کا انکشاف ہوا ہے جہاں ایک نقاب پوش شخص نے صرف “مقامی نہ ہونے” پر اس کے چہرے پر چاقو سے وار کر دیا۔

اسٹافورڈ کراؤن کورٹ میں سماعت کے دوران بتایا گیا کہ 25 سالہ ایڈم پلانٹ نے 15 اگست 2023 کو یہ حملہ اس وقت کیا جب متاثرہ شخص برٹن کے “تھری کوئنز ہوٹل” میں اپنی پہلی رات گزار رہا تھا۔

استغاثہ کے مطابق ایڈم پلانٹ اپنے ساتھیوں کے ساتھ سیاہ لباس اور نقاب میں آیا اور متاثرہ شخص سے پوچھا کہ آیا وہ مقامی ہے یا نہیں۔

جب متاثرہ شخص نے بتایا کہ وہ مقامی علاقے سے تعلق نہیں رکھتا تو ملزم نے اچانک اس کے چہرے کے بائیں حصے پر چاقو سے خوفناک وار کر دیا۔

عدالت کو بتایا گیا کہ حملے میں متاثرہ شخص کے چہرے پر تقریباً 15 سینٹی میٹر لمبا زخم آیا جبکہ اس کی جبڑے کی ہڈی بھی ٹوٹ گئی۔

پولیس نے بعد میں ایڈم پلانٹ کو ریلوے اسٹیشن کے قریب گرفتار کیا جہاں اس کے ہاتھوں پر خون لگا ہوا تھا۔

پولیس کے مطابق ملزم کے قبضے سے چاقو، ناکل ڈسٹر اور دندانے دار بلیڈ بھی برآمد ہوا۔

گرفتاری کے وقت ملزم نے پولیس کو کہا: “میں نے غلط کیا ہے۔”

متاثرہ شخص نے عدالت میں جمع کرائے گئے اپنے بیان میں کہا کہ حملے کے بعد اس کی زندگی مکمل بدل گئی ہے۔

اس نے کہا کہ “اب لوگ میرے چہرے کو گھورتے ہیں، خاندان والے سڑک پار کر جاتے ہیں اور مجھے مستقبل کے تعلقات کے بارے میں بھی خوف رہتا ہے۔”

ملزم ایڈم پلانٹ، جو بے گھر بتایا جاتا ہے، نے سنگین جسمانی نقصان پہنچانے اور اسلحہ رکھنے کے الزامات قبول کر لیے ہیں۔

عدالت نے سزا سنانے کی کارروائی 14 مئی تک ملتوی کر دی ہے۔