پاکستان کی نیوکلیئر صلاحیت مادر وطن کے دفاع  اور سالمیت کی ضامن ہے،  جنرل ندیم رضا

چیئرمین جوائنٹ چیف آف اسٹاف کمیٹی جنرل ندیم رضا نے کہا ہے کہ پاکستان کی نیوکلیئر صلاحیت مادر وطن کے دفاع  کے خلاف سالمیت کی ضامن ہے۔

پاک فوج کے شعبہ تعلقات عامہ (آئی ایس پی آر) کے مطابق نیشنل انسٹیٹیوٹ آف پالیسی کے تحت علاقائی عوامل اور سیکورٹی پر سیمینار منعقد کیا گیا۔

آئی ایس پی آر نے بتایا کہ  چیئرمین جوائنٹ چیف آف اسٹاف کمیٹی جنرل ندیم رضا  نے سیمینار سے خطاب کیا اور کہا کہ قومی سیکورٹی ناقابل تقسیم ہے۔

جنرل ندیم رضا کا کہنا تھا کہ پاکستان کے نیوکلیئر پروگرام کو عوام اور تمام سیاسی جماعتوں کی حمایت حاصل ہے، سول اور ملٹری قیادت نیشنل کمانڈ اتھارٹی کے اس اسٹریٹیجک پروگرام کے ساتھ سیسہ پلائی دیوار کی طرح کھڑی ہے۔

انہوں نے کہا کہ پاکستان ایک ذمہ دار اور پراعتماد نیوکلیئر ملک ہے، پاکستان اپنے نیوکلیئر پروگرام پر کسی بھی قسم کا سمجھوتہ نہیں کرے گا۔

آئی ایس پی آر کے مطابق انہوں نے کہا کہ پاکستان کی پالیسی فل اسپیکٹرم ڈیٹرنس ہے جو کہ قابل اعتماد ایٹمی توازن کے دائرہ کار میں ہے۔

جنرل ندیم رضا کا کہنا تھا کہ ہماری قومی سیکورٹی اور سیفٹی میکنزم ہر قسم کے خطرے کے خلاف تمام قومی اور بین الاقوامی ضابطوں کے مطابق ہے، قومی اسٹریٹیجک پروگرام پر بے بنیاد اور غیر ضروری تبصرے سے ہر صورت گریز کیا جائے۔

اس موقع پر انہوں نے کہا کہ نیوکلیئر ممالک میں رائج طریقہ عمل کے مطابق صرف نیشنل کمانڈ اتھارٹی ہی اسٹریٹیجک پروگرام پر ریسپانس اور تبصرہ دینے کی مجاز ہے۔