امریکی شہر فلاڈیلفیا میں ہجوم پر فائرنگ، 3 افراد ہلاک 11 زخمی

امریکی شہر فلاڈیلفیا میں ہجوم پر فائرنگ، 3 افراد ہلاک 11 زخمی

فلاڈیلفیا: امریکی شہر فلاڈیلفیا کے علاقے ساؤتھ اسٹریٹ میں فائرنگ کی آوازیں سنی گئی ہیں۔

غیر ملکی خبرایجنسی کے مطابق امریکہ کے شہر فلاڈیلفیا میں ساؤتھ اسٹریٹ کے علاقے میں فائرنگ کی آوازیں سنی گئی ہیں جبکہ پولیس کے پہنچنے پر حملہ آور اسلحہ چھوڑ کر فرار ہوگئے ہیں۔

خبرایجنسی کے مطابق پولیس نے علاقے کو قبضے میں لے کر تحقیقات کا آغاز کردیا ہے جبکہ یہ واقعہ ہفتے کی رات کو رپورٹ کیا گیا ہے۔

اتوار کی صبح ایک نیوز کانفرنس کرتے ہوئے اسپکٹر ڈی ایف پیس کا کہنا تھا کہ پولیس افسران نے کئی شوٹرز کو ہجوم پر فائر کرتے دیکھا جس کے بعد ایک اہلکار نے شوٹر پر گولی بھی چلائی۔

ان کا کہنا تھا کہ یہ ابھی تک واضح نہیں ہوسکا ہے کہ اہلکار کی فائرنگ سے مشتبہ شخص ہلاک ہوا ہے یا نہیں تاہم ملزم اپنا اسلحہ چھوڑ کر فرار ہوگئے ہیں۔

اسپکٹر ڈی ایف پیس کے مطابق جائے وقوعہ سے کم از کم دو بندوقیں بر آمد ہوئی ہیں جن میں سے ایک کے پاس اضافی میگزین بھی موجود تھا۔

ان کے مطابق جائے وقوعہ سے 200 سے 300 خالی خول بھی بر آمد ہوئے ہیں جبکہ مجموعی طور پر 14 افراد کو گولیوں کا نشانہ بنایا گیا ہے۔

پیس کا کہنا تھا ان متاثرین میں سے 3 افراد ہلاک اور 11 زخمی ہوگئے ہیں، جاں بحق ہونے والوں میں 2 مرد ایک خاتون شامل ہیں جن کے جسم پر متعدد گولیوں کے نشان موجود ہیں۔

اسپکٹر ڈی ایف پیس نے کہا کہ آپ تصور کرسکتے ہیں کہ فائرنگ کے وقت ساؤتھ اسٹریٹ پر سینکڑوں افراد موجود تھے جیسا کہ ہر ہفتے کی شام ہوتے ہیں۔

انہوں نے مزید کہا کہ اب تک کوئی گرفتاری عمل میں نہیں لائی جاسکی ہے، کم از کم ایک شوٹر تو امریکی اسٹریٹ پر جنوب کی جانب بھاگتے ہوئے دیکھا گیا تھا تاہم پولیس سی سی ٹی فوٹیج حاصل کررہی ہے تاکہ ملزمان کی شناخت کی جاسکے۔